OMT ta conseha pa no habri frontera cu Merca y Latino America ainda

ORANJESTAD – Si ta pa RIVM y e Outbreak Management Team Caribe (version di OMT di nos region) y Rijks Instituut Voor Milieu en Natuur (RIVM) di Hulanda, nos no por habri frontera pa ni Merca ni paisnan  den Latino America ainda. Por lo menos esey ta un di e consehonan cu tanto RIVM como OMT ta recomenda den nan ultimo carta fecha 3 di juni 2020, cual e matutino di Corsou Antiliaans Dagblad a referi na dje y cu e portal aki tambe tin den su poder. 

ARUBA AINDA NO A DICIDI

Mientras cu tanto Corsou como Bonaire ta cla cu nan fecha pa reapertura di nan respectivo isla, Aruba ainda ta deliberando riba esun di dje. Y den e respectivo recomendacionan (sigur di Corsou) ta mustra cu por lo pronto no ta habri frontera cu Merca. Algo cu pa Aruba por bira problematico, ya cu esaki ta e mercado principal turistico. Cu Aruba ta duna oido na esaki, no ta conoci ainda. 

CONSEHO

Hulanda mientrastanto pues, a presenta su conseho pa cu e proceso aki. Y e ta mustra cu e no ta nada facil, y cu tin cu tene cuenta cu un sin fin di rekisito. Cada un cu nan bentaha y desbentaha. A pidi pa adapta nan seleccion di pais cu ta permiti pa habri pe, conforme e situacion di cada pais individualmente. Asina ta papia di un ‘triage’ pa pasahero pa determina ken por biaha y ken no, gana experiencia door di pone un limitacion di cantidad di turista pa drenta e islanan (Corsou p.e. a pone un maximo di 10 mil turista pa luna), haci palabracion concreto cu e industria di turismo pa loke ta higiena y regla pa cu COVID, testmento na cantidad grandi, y informacion suficiente pa e comunidad.   

FRONTERA CU MERCA

Como sugerencia, RIVM ta sugeri pa e.o. bin cu un prohibicion di entrada pa paisnan unda e contagio di COVID-19 ta halto, pa asina limita e cantidad di pasahero cu por keda infecta. Pero ta mustra cu e sugerencia aki, cierto mercado necesario manera Merca y paisnan den Latino America, ta wordo completamente exclui. 

METODO DI CONTROL

Mientras cu e conseho ta referi tambe na por lo menos 4 metodo di control, nan ta ilustra mes momento tambe e fayonan cu cada metodo ta presenta. Entre nan, midimento di temperatura. Esaki pasobra mientras cu e ta mustra di ta un forma di alerta riba e condicion di un pasahero, hopi biaha un keintura of otro simptoma di calor por wordo interpreta robez y e no ta hopi confiabel. Tambe tin e parti di triage unda cu pa medio di papia cu e pasahero, ta documenta nan situacion. Problema ta cu tin cu confia riba e honestidad y transparencia di e pasahero pa e informacion cu e por duna. Ademas, si un pasahero haci un declaracion na comienso di su biahe, esaki por cambia (esta su situacion) pa ora cu e yega su destinacion. Ademas e ta rekeri pa tin hopi hende disponibel pa eherce e trabou ey. Y uno cu tambe toch no a resulta positivo, ta ora cu ta test un pasahero prome cu e biaha, pasobra tin casonan caba (noticiacla mes a raporta uno di Grecia) unda cu a test negativo prome cu e buelo sali, pa ora cu e buelo yega e destinacion, nan ta resulta positivo toch. 

CUARENTENA

Otro aspecto ta esun di cuarentena. Aki tambe tin varios scenario presenta pa atende cu ne. Entre nan pa pone tur turista cu yega e islanan, pa bay den cuarentena 14 dia. Problema ta cu esaki no ta loke un turista kier, sigur si, si e estadia di e turista ta menos cu e 14 dianan ey. Pues hopi realistico segun RIVM esaki no ta. Tambe ta papia di e COVID hotels of lugarnan special di hospedahe pa e turistanan, pa asina separa turistanan di e comunidad local. E turista por disfruta di e facilidad di e hotel, pero esun perhudica e ora ta e personal di e hotel of facilidad, cu lo mester tin un protocol y forma di control special pa nan. No ta sigur cu esaki lo funciona tampoco. Tambe introduccion di un toque de queda turistico valido pa cierto area ta sugeri, pero esaki den practica no ta mucho atractivo. Y finalmente, pone un limitacion of maximo di cantidad di turista cu por biaha, pa asina controla e cantidad. Entre otro ta papia pa Corsou, cu e prome luna, por permiti solamente 10 mil turista pa drenta. Y si bay bon, ta aumenta e cantidad e proximo luna.