Corsou cla pa habri frontera cu Hulanda pero no Aruba

Corsou cla pa habri frontera cu Hulanda pero no Aruba

Posted on 06/6/2020 9:24 pm AST | Updated on 06/6/2020 9:33 pm AST

WILLEMSTAD – Mientras cu Aruba ainda no por caba anuncia un fecha exacto pa habri frontera, Corsou ta mustra di ta cla caba. Problema ta cu Aruba no ta parce di ta den e plan di Corsou. Den un documento cu noticiacla.com tin den su poder, esaki ta mustra cu ora cu Corsou habri frontera 1 di juli, Aruba tin cu warda un poco mas.  Pero Aruba no ta su so. T] Merca, Canada, Latino America y St Maarten tambe ta riba e lista cu no por biaha pa Corsou ainda. Asina esnan cu a participa den un reunion reciente na Corsou entre dr Izzy Gerstenbluth y e sector hotelero. A dicidi si cu pa 1 juli proximo, Corsou ta cla pa habri frontera cu islanan BES, Hulanda y paisnan di poco riesgo di den otro paisnan di Union Europeo manera Alemania y Belgica). Paisnan manera Spaña y Inglatera tampoco. E intencion ta pa limita e cantidad di pasaheronan na 10 mil pa e prome luna. Si cos bay bon ta aumenta esaki den e di dos luna (augustus). 

ARUBA

Aruba manera informa, Corsou no kier permiti ainda, mescos cu e otro paisnan menciona anteriormente. Si dicidi toch pa habri pa Aruba, esaki ta bay cu condicion cu pasaheronan tin cu bay den cuarentena di 2 siman den un hotel apunta.  Bonaire lo anuncia su plan entrante diaranson awor. Mientrastanto Aruba a anuncia algun tempo atras caba cu ta planea pa habri frontera entrante 15 di juni y 1 di juli 2020, pero ainda no tin fin di duna un fecha exacto. A compronde cu sea internamente of entre e e paisnan den Reino, Aruba, Corsou, St Maarten, y islanan BES no por haya otro. Kico e problema ta, no ta conoci pa noticiacla aunke cu fuentenan cerca di e situacion, ta mustra cu tin algo cu ta stroba gobierno di Aruba y e crisis team pa anuncia e fecha exacto. Recientemente riba un pregunta di e portal aki, miembro di e crisis team a confirma cu e decision pa habri frontera ta un decision cu tur 4 pais ta tuma hunto (los di islanan BES). Bonaire mes momento a informa pues cu otro siman nan ta participa nan plan. 

  • Gerstenbluth: Aruba y St Maarten ta tuma un riesgo cu turistanan Mericano

    Gerstenbluth: Aruba y St Maarten ta tuma un riesgo cu turistanan Mericano

    WILLEMSTAD – Aruba y St Maarten ta tuma un riesgo cu turistanan Mericano. Asina e epidemiologo di Corsou Izzy Gerstenbluth a bisa durante e briefing di COVID-19 na Corsou diamars mainta. Entrante 1 di juli, Corsou ta habri frontera pa Hulanda y otro paisnan di riesgo mediano sin cuarentena obligatorio. Tin un maximo di 10 mil pasahero pa luna cu por bishita Corsou. Segun Corsou, paisnan cu riesgo abou ta   Aruba, Boneiru, Corsou, St. Eustatius, Saba y St. Maarten. Paisnan cu tin un riesgo mediano ta Belgica, Canada, China, Alemania, Francia, Hulanda, Italia y Spaña.   Gerstenbluth a bisa awe mainta tambe pues cu Corsou lo no habri frontera pa turistanan for di MerCa. ‘Merca ta un riesgo grandi. Europa tambe ta cera su frontera pa Mericanonan. Sint Maarten lo habri frontera pa turista di Merca mañan, y Aruba riba di 10 di juli. Cu esaki nan ta tuma un riesgo. Mi ta comprende nan, pasobra Aruba y Sint Maarten ta depende hopi mas di turistanan for di Merca cu Corsou. Pero e ta keda un riesgo. Corsou no ta tuma e riesgo ey.’ Gerstenbluth a sigui bisa. Mientrastanto St Maarten a anuncia diamars cu nan ta pospone e reapertura aki cu 2 siman, esta 14 di juli proximo. 

  • Gobierno Mericano a emiti alerta pa su ciudadanonan na Corsou

    Gobierno Mericano a emiti alerta pa su ciudadanonan na Corsou

    WILLEMSTAD – Gobierno Mericano pa medio di su consulado na Corsou, a emiti un alerta di seguridad pa ciudadanonan Mericano riba e isla, pa cu e situacion actual despues di e reciente disturbionan. Mientras cu gobierno di Corsou a elimina e toque de queda diabierna, gobierno Merca si no ta tuma chens. E alerta ta pidi ciudadanonan y staf di e consultado pa keda cas despues di 7or, no obstante e hecho cu gobierno di Corsou emiti un toque de queda of no. 

  • Girigorie: No ta necesario pa sigui toque de queda na Corsou

    Girigorie: No ta necesario pa sigui toque de queda na Corsou

    WILLEMSTAD – No tin necesidad pa extende e toque de queda e fin di siman aki na Corsou. Asina minister di husticia Quincy Girigorie a informa durante e conferencia di prensa di gobierno diabierna mainta. E motibo ta cu a reuni y a dicidi di pone un plan den accion cu toch ta crea e seguridad necesario den comunidad e weekend aki. Lo por mira mas polis riba caminda cu lo percura pa e seguridad necesario. 

  • Corsou a conoce otro anochi turbulento cu hopi candela

    Corsou a conoce otro anochi turbulento cu hopi candela

    WILLEMSTAD – Pa un di dos anochi sigui, Corsou a conoce un anochi turbulento, unda cu candela a domina e isla grandemente. E disturbionan cu a cuminsa diaranson cu e meta pa baha gobierno di Corsou, y cu a haya un toke violento y destructivo, despues di un marcha mas tempran diaranson. E casonan di destruccion a intensifica diaranson anochi y ayera atrobe esaki a sigui. Un caso cu a hala hopi atencion ta e hecho cu a cende un local di un scol na candela tambe. Ta trata di un local di Brionschool. Hopi candela di mondi a pone bomberonan tin un anochi hopi ocupa. Na Groot Kwartier candela di mondi tabata asina grandi cu dado momento mester a saca hendenan di nan cas.  Algun caminda cu tabatin candela tambe, tabata na Sta. Helena. Amandelweg, Blanquillaweg, Haitiweg, Ijselstraat y mas. Riba Caracasbaaiweg tabatin diferente candela y kiebro. Entre lugarnan cu a sufri, tabat Rapid Tronic na Caracasbaaiweg, unda cu a drenta y horta basta telefon y otro artefactonan electronico. E situacion ta sigui tenso na Corsou. Awe mainta atrobe lo tin un conferencia di prensa pa duna un relato completo di kico a sosode. 

  • A detene 48 persona na Corsou cu a causa destruccion durante manifestacion

    A detene 48 persona na Corsou cu a causa destruccion durante manifestacion
  • DOW y ciudadanonan concerni a haci Punda limpi bek

    DOW y ciudadanonan concerni a haci Punda limpi bek

    WILLEMSTAD – Un grupo di ciudadano cu ta yama ‘Papia Cu Mi’ hunto cu DOW na Corsou diahuebs mainta tempran a haci henter Punda y Otrabanda limpi despeus di e disturbio y destruccion di ayera tardi. Tabata impresionante mira con un grupo di ciudadano preocupa tabata conciente di e impacto negativo cu e lugar lo tabatin si lag’e asina mahos. Tabatin basta destruccion cu a tuma lugar, cu mester a keda regla. DOW a laga drecha loke tabata kibra cu mester a drecha, y a haci e cayanan limpi. Pero e grupo di ciudadano tambe a coi basora y haci nan trabou. Potretnan cortesia Facebook Papia Cu mi. 

  • Powered by SETAR