E posibilidadnan cu ta keda pa Minister Marisol Lopez Tromp

ORANJESTAD – E aña aki Marisol Lopez Tromp (50) ta cumpli 22 aña den politica activo. Por lo menos di punto di bista cu e ora el a subi lista pa prome biaha den un eleccion parlamentario, cuminsando su carera politico. Binti dos aña despues, e pregunta ta cu awor cu e ta den un problema cu partido POR (segun e partido por lo menos), e ta dilanti un otro situacion unda cu (atrobe) e tin cu analisa su carera y wak kico su siguiente paso ta. Si ta pa voto, esaki ta su momento mas abou politicamente cu apenas 497 ricibi durante e ultimo eleccion. Si ta pa su posicion, e ta minister ‘atrobe’ pa 6 luna. E tin cu analisa cu si e ta sigui te e proximo eleccion cu ta otro aña, of ta retira manera cu su partido ta exigi di dje. Si e ta keda como minister, con esaki lo funciona, den ki capacidad y kico ta e posibilidadnan. 

POSIBILIDAD

Expertonan politico a splica e portal aki cu tin varios opcion. Uno, e ta keda como minister, y distancia su mes di e partido POR, pa cual gabinete MEP por tine como un vak minister y e ta bira un tipo di 'gedogen beleid'. Ta keda na partido POR si nan ta acepta esaki. Sea minister Andin Bikker ta keda unda cu e ta, y ta sigui como minister y ta tolera e situacion te cu eleccion. Of e ta dicidi cu e no ta traha cu e mandatario y ta retira sosten na e gabinete, pa cual e gabinete mester yama eleccion nobo. Of, Lopez Tromp ta tene honor na su mes y ta retira, creando asina un espacio pa un politico otro di e partido. Esaki segun regla, lo ta Joslyn Croes, cu actualmente ta minister Plenipotenciario na Washington. Esey ta si e dos parlamentarionan di e partido no tuma e posicion di e minister. Si un di nan tuma esaki, e ta crea un espacio habri atrobe pa Lopez Tromp, cu por tuma e asiento y, posiblemente bira independiente, manera e situacion ta aworaki. Pues no ta cumbini pa e dos parlamentarionan asumi rol como minister. Henter e episodio aki, si analisa e historia politico di Lopez Tromp, por mustra cu porta tur esaki, no ta necesario y bale la pena.

RESULTADONAN ELECTORAL 

Mientras cu su prome resultado electoral tabata respectable cu 1538 voto na 1998, su peak tabata sigur na 2001 ora cu el a haya 4708 voto na number 4 riba e mesun lista di MEP. Y su punto mas abou pa loke ta voto, tabata cu eleccion 2017 unda cu el a logra apenas 497 voto riba lista di POR. Pa loke ta funcion, esaki tabata di parlamentario, pa minister dos termino, presidente di Parlamento y te na final aki, 6 luna como minister, e pregunta cu hopi a haci, ta con mester interpreta e carera aki. Y for di e base di voto, si ta necesario pa sigui den politica. Si ta pa e mandatario, e no ta cla pa retira y ta awor e la cuminsa cu su trabou den e gabinete aki, como minister. 

HISTORIA DI MARISOL LOPEZ TROMP

Si mester analisa e cantidad di voto, Cu excepcion di su comienso na 1998, for di momento cu e la yega su peak na 2001, cada eleccion cu el a participa despues, el a keda baha den voto, y esaki el a haci consistente. Di 4708 na 2001, pa 4392 na 2005, cu MEP, el a yega su punto mas abou cu MEP na 2009 cu 2880 voto. Un problema den partido a pone cu na 2010 el a retira y bira independiente pa di prome biaha. Pa eleccion di 2013 el a uni cu partido AVP unda cu riba e ultimo posicion, e la sigui baha y haya 1642 voto, unda cu el a acepta posicion di presidente di Parlamento. Pero tres aña despues, Lopez Tromp a bolbe haya problema y a bandona e partido na 2016. A bolbe bira parlamentario independiente pa despues na 2017 e uni cu partido POR unda cu aunke riba un posicion halto, (#3), el a haya su cantidad mas abou di 497 voto. E proximo dianan aki ta bira decisivo pa Lopez, unda cu sin cu e tabata kier, tin cu tuma un decision, atrobe, y wak, kico finalmente ta bira su destino nobo.