ORANJESTAD – E situacion sin precedente di COVID-19 a ofrece e oportunidad pa WEB Aruba ehecuta dos proyecto pa reemplasa partinan di tuberia mayor di awa. Bou di circunstancia normal lo tawata casi imposibel pa ehecuta e proyectonan sin afecta nos turismo. Ta trata di dos trayecto di tuberia na L.G. Smith Boulevard y na J.E. Irausquin Boulevard. Diaranson 10 di juni tres diferente contratista local lo inicia e dos proyectonan simultaneamente. Di e forma ey ta haci uzo di e hecho cu actualmente tin menos trafico y bishitante. Ta spera di finalisa e proyectonan dentro di dos luna y mey. Segun e trabou ta progresa, automobilistanan lo experencia desviacion di trafico y parkeo y formamento di fila. Un suplica ta bay na tur automobilista pa baha speed y respeta borchinan di trafico den e areanan concerni.
Via nan pagina di Facebook, WEB lo duna update periodicamente pa mantene comunidad na altura di e trabounan y desviacion di trafico. A prepara e proyectonan den consulta cu DOW, Polis y Aruparking.
E prome proyecto ta e reemplaso di tuberia di awa di 10 inch cu un largura di 1 km, cuminsando dilanti Hotel Riu Palace te na Holiday Inn Resort. E di dos proyecto ta reemplaso di tuberia di 12 inch cu un largura di mas o menos 1.4 km entre Lagoen/West Deck Restaurant te cu e tanki di awa pabou di CITGO Boulevard.
Proyecto Reemplaso tuberia trayecto Riu Palace - Holiday Inn Resort
Pa lo cual ta e trayecto Riu – Holiday Inn, lo coba canto di caminda, pone seccionnan di e tuberia for di servicio, kita e tuberia bieu y instala e tuberia nobo. Esaki lo trece interupcion di awa cu lo no ta mas cu 8 ora pa cada seccion. WEB lo coopera mas tanto posibel cu e hotelnan, negoshinan y residencianan riba ruta. Esaki ta encera cu lo restaura vegetacion, materialnan di indicacion y otro tipo de embeyecimento lo mas tanto posibel den su estado original.
Proyecto Reemplaso tuberia trayecto West Deck Restaurant – Tanki tereno Waf
Pa lo cual ta e trayecto Lagoen – Tanki na Waf, lo parti e trabounan den dos seccion. E prome seccion ta e trayecto na haltura di West Deck Restaurant te na e asina yama brug di Renaissance. E di dos seccion ta di brug di Renaissance te na e tanki pabou di CITGO Boulevard. Aki tambe WEB lo traha hunto cu e hotel y negoshinan riba e ruta y restaura e area afecta mas tanto posibel.
WEB lo tuma tur precaucion y medida nececario pa limita e inconveniencia durante e trabou di construccion. Tres contratista local lo traha simultaneamente bou di coordinacion di lidernan di proyecto di WEB. E proyectonan no solamente ta contribui na mantene e suministro di awa di calidad halto cual WEB Aruba ta para p’e. Durante e tempo dificil actual nan ta contribui tambe na economia di nos isla. Di antemano WEB Aruba ta ofrece su disculpa pa e inconveniencia cu e trabounan lo trece pa e areanan envolvi y pa automobilistanan. Pa posibel pregunta por yena e formulario di contacto riba webaruba.com of yama WEB Aruba su Call Center na tel. 280-4600.
ORANJESTAD - Un grupo di persona dialuna mainta durante e ceremonia protocolario relaciona cu Himno y Bandera, a dicidi di protesta cu pancarta dilanti e gobernantenan presente. Riba e pancartanan tabatin varios lema, variando di temanan economico pa tema di medio ambiente. Autoridad presente a haya nan mes ta pone ordo pa evita cualkier problema.
ORANJESTAD - Awe cu e proyecto di Aruba Doet, Gobernador di Aruba Alfonso Boekhoudt tabata na Noord pa yuda cu e proyecto di Ban Lanta y Planta, caminda e la planta matanan di Aruba. Un bunita proyecto cu lo crea un impacto significativo.Awe ta inicia e dos dianan di e acto di Aruba Doet unda cu miles di voluntario ta participa den un of otro proyecto pa drecha esaki na bienestar di nos comunidad. Mayan tambe tin e proyecto aki.
ORANJESTAD – Departamento di Impuesto ta informa cu dia 2 di april 2024 ta ultimo dia pa entrega e lista colectivo di salario (verzamelloonstaat of VZL) y e lista colectivo di pago na tercera persona (verzamelstaat opgaaf derden of VOD) di aña 2023. Tur doño di trabou of comerciante mester entrega e listanan menciona den forma digital via e portal ‘BO impuesto’ (BOi) di Departamento di Impuesto.
ORANJESTAD - Den un esfuerso pa reforsa desaroyo turistico sostenibel di e isla, A.T.A. a lansa un encuesta cu ta enfoca riba e sentimento local encuanto turismo na Aruba. Esaki ta bira e di tres encuesta similar cu A.T.A. ta lansa, e prome encuesta a tuma lugar na aña 2018 prome cu e pandemia, y un biaha mas na aña 2022 cu ta despues di e pandemia. E informacion y resultadonan ta sirbi como un base pa forma e strategia di A.T.A., y por fungi como un conseho na diferente socionan. Pa actualisa e estudio aki, A.T.A. ta realisa e siguiente ‘Local Sentiment Survey’ pa midi e sentimento local den 2024.