Minister Marisol Lopez no ta mira pakico e tin cu retira

ORANJESTAD – “Mi ta sumamente sorprendi y tambe babuca pa e cosnan cu a wordo treci dilanti riba mi persona” tabata e prome palabranan di minister Marisol Lopez Tromp, algun ora despues di tende cu su partido ta exigi su retiro. E mandatario a haya un invitacion atardi cerca Gobernador, y despues di dos ora largo, e mandatario a duna prensa su prome declaracion. E contenido di e reunion mes no por a keda divulga y como tal no sa pakico e reunion lo a dura asina largo (casi 2 ora) siendo cu audiencianan normal ta dura entre 30 pa 40 minuut. Mes momento e mandatario ta bisa cu e no ta sinti cu e tin motibo pa retira, y ta warda e carta di partido pa despues e wak ki paso e ta tuma. E hechonan cu e partido a trece dilanti, segun e mandatario pues, no ta motibo pa un minister retira. 

MOTIBO PA RETIRO

Segun Lopez Tromp, e tabata den reunion di conseho di minister diabierna maintain ora cu el a tuma nota di e conferencia di prensa, y a sali pa por a mira esaki. E loke a sorprende, ta e argumentonan y motibo duna pa cual e lo mester retira. E ta recorda su partido, cu esun na ken e tin cu duna cuenta, ta na Parlamento, cu a pone eynan. Y el a recorda cu ta Parlamento ta dicidi riba e maneho di gobierno, y consecuentemente minister. E ta sinti cu el a bin ta cumpli cu e metanan cu e gabinete Wever Croes a stipula pa haci. 

ACUSACION

E no ta reconoce e acusacionan treci riba dje, entre nan e situacion na Parke Arikok, unda cu lo a tuma decision cu lo perhudica Aruba y e parke. Segun e mandatario, ta e directiva di e parke ta esnan cu tin e maneho di e parke y cu ta dicidi ken por drenta y ken por sali. E argumento di mal maneho riba e tereno ey como tal a cay hopi straño. Pa loke ta Serlimar, Lopez Tromp a splica cu ta e siman aki el a pasa cu e directiva di Serlimar den Parlamento splicando y contestando pregunta riba e parti financiero ‘den un forma habri y transparente’. Riba pregunta di noticiacla, a sigura cu e no ta esun cu a duna orden pa solicita un surseance van betaling y cu esaki a wordo dicidi pa tur e miembronan di directiva. Y cu e ta algo necesario pero cu no ta el a dicidi. 

KICO TA SU FUTURO

E mandatario a splica cu te cu awor, e no a ricibi un carta di e partido pa e retiro manera cu nan lo kier y e ta warda e carta ey yega pa despues e tuma su decision. Pero el a bisa tambe cu e no ta haya cu e tin cu retira, y cu e lo atende cu e asunto durante un proximo conferencia extenso unda cu e lo atende cu tur e puntonan cu a keda menciona diabierna mainta durante e conferencia di prensa. Pero atrobe e mandatario no ta sinti cu el a haci algo pa cual e mester retira.