Casi 50% di e hogar na Aruba cu risico halto di perde nan entrada

Casi 50% di e hogar na Aruba cu risico halto di perde nan entrada

Posted on 06/5/2020 10:30 am AST | Updated on 06/5/2020 1:20 pm AST

ORANJESTAD – Casi 50% di e hogar na Aruba ta core e risico halto di perde nan entrada pa motibo di COVID-19. Asina minister di economia Xiomara Maduro a bisa durante un conferencia di prensa reciente. E tema tabata un informacion compila pa Oficina di Estadistica (CBS) tocante e efecto cu COVID-19 tin riba e desempleo y hogarnan na Pais Aruba.

AUMENTO DRASTICO DI DESEMPLEO 

E mandatario a informa cu prome cu e crisis di COVID-19,  desempleo na Aruba tabata 5% bou di hende homber y 5% bou di hende muhe. Un total di 5.1% di e poblacion di Aruba tabata sin trabou. Na momento cu COVID-19 a presenta na Aruba y cu Gobierno a introduci e medidanan pa proteha e salubridad di Pais Aruba, e cifranan a subi drasticamente. Actualmente 77% di hende homber y 69.6% di hende muhe na Aruba ta den risico pa perde trabou. Esaki ta forma un total di 73.1% di nos poblacion cu ta keda desemplea. Pa locual ta e trahadornan registra na SVB, 76.6% hende homber y 69.4% hende muher tin chens di perde nan entrada, cu ta un total di 72.8% di persona registra na SVB cu ta core e risico di perde nan entrada. Esaki ta e situacion sin e yudansa di Subsidio di Salario.

CASI 50% DI E HOGARNAN NA ARUBA TIN RISICO HALTO PA PERDE ENTRADA

E cifranan compila ta mustra cu 26% di hogarnan na Aruba no tin risico di perde entrada, 14% tin un risico mínimo, 11% tin un risico modera y 49% tin un risico halto di perde entrada door di desempleo.

SUBSIDIO DI SALARIO TA BRINDA ALIVIO 

Segun e mandatario, Gobierno a brinda alivio den forma di Subsidio di Salario den luna di mei na 1.647 compania. Un total di 50.9% di e companianan cu ta vulnerabel a aplica pa e ayudo financiero aki pa asina por a percura pa 27.180 trahador por a keda ricibi un salario. Cu esaki un total di 72.7% di e personanan vulnerabel por a keda cu un entrada. Gobierno a brinda un suma total di  Afl. 46.814.301 miyon florin na Subsidio di Salario pa luna di mei. E sosten financiero a wordo facilita door di un fiansa di Reino Hulandes pa Aruba.

DESICION

Maduro a sigui bisa cu Gobierno mester tuma decision necesario pa por yega na e fondonan. E mandatario ta subraya cu esaki ta e realidad di Aruba actualmente. Pa e motibo aki Gobierno di Aruba mester a tuma decisionnan necesario y traha diligentemente pa por cumpli cu e condicionnan di Reino Hulandes pa yega na e fondonan necesario y asina por brinda alivio den forma di Subsidio di Salario. Keda sin tuma decision ta trece cune cu casi mitar di e hogarnan na nos Pais lo biba den e angustia di no por conta riba un entrada. 

 

  • Powered by SETAR