Oduber: Seguro obligatorio pa COVID-19 pa tur turista cu biaha pa Aruba

ORANJESTAD – Tur turista cu yega Aruba ora cu frontera habri, mester tin un seguro pa COVID-19, sino e no por subi avion pa bin nos isla. Asina minister di turismo y salud DAngui Oduber a confirma pa noticiacla.com diahuebs anochi. Tabata durante e forum di turismo na Telearuba diahuebs anochi cu e mandatario a divulga e informacion cu a keda cla pa loke ta e asunto di estadia pa turistanan cu keda diagnostica cu nan tin e virus. Y pa cubri esaki, nan mester tin e seguro menciona. 

SEGURO OBLIGATORIO

For di momento cu gobierno a cuminsa delibera riba e idea di busca un ‘COVID hotel’ pa turistanan cu keda contagia cu e virus mientras cu nan ta na Aruba, a surgi e pregunta ken ta cubri e gastonan extra ey. Y esey gobierno no por a sali afo ainda. Pero ayera nochi finalmente e mandatario a divulga cu a logra keda cla cu e parti ey. E forma con lo financia esaki, lo ta pa medio di e seguro extra cu e turista ta cera, prome cu e biaha pa Aruba. “E ta obligatorio” Oduber a sigura e portal aki. “E intencion ta pa koppel e COVID19 insurance aki na e ED card. Dus e ED card ta mandatario. Sin esaki (e turista) no por board” e mandatario a sigui bisa. Como tal tur esaki mester ta regla prome cu e turista yega nos isla. E gastonan ey e ora ta core pa e turista, pa medio di e seguro aki. A sali di e punto di salida cu e contagio lo no ta ‘serio’ manera mayoria di e casonan pa cual no mester hospitalisa e turista. E mandatario a confirma pa e portal aki cu e  covid insurance lo cubri opname na hospital y tambe ICU si esaki ta necesario.