Encuesta: Mayoria chikito na Aruba ta pro pa registra matrimonio mesun sexo

ORANJESTAD – Un sentencia recien di corte, ta toca e tema di matrimonio di mesun sexo, y mas specifico, su registracion na Aruba. Corte den un sentencia recien a hala atencion di gobierno cu nan no ta actuando corecto pa wanta e decision si por registra un pareha di mesun sexo na Aruba. Nan ta bisa si, cu corte no por impone y dicidi pa gobierno. 

ENCUESTA PA SA PENSAMENTO

A base di e sentencia aki, noticiacla a haci un encuesta pa wak con e tema aki ta biba den comunidad. Berdad cu awor e comunidad ta den gara di COVID-19, pero mirando cu e sentencia no ta tende cuenta cu esaki, a opta pa mientras cu e tema ta ‘recien’, pa haci un encuesta riba esaki. Y e resultado di un encuesta di un siman di noticiacla.com ta mustra cu un mayoria chikito ta pro pa tanto registra union civil y matrimonio di parehanan di mesun sexo na Aruba. 

CANTIDAD 

Un total di 1197 a participa di cual 65.91% (789) a bisa cu nan ta di acuerdo cu ambos posibilidad, mientras cu 34.09% (408) a bisa cu sea nan ta contra of kier solamente e registracion. Riba e pensamento mas specifico riba e tema aki, 54.83% (647) a bisa cu nan no tin ningun obhecion riba e temanan aki, mientras cu den e grupo cu ta contra of tin cierto problema cu e temanan, 45.17% (553) a bisa mas specifico pakico nan lo no kier esaki. 

SPECIFICO

Manera indica, e grupo mas grandi, no tin ningun obhecion pa e tema aki, y ta ok cu ne. A sali di punto di bista cu bo ta pro of contra. Si bo ta pro, ta un opcion pero tabata interesante pa sa di esnan cu lo por ta contra, pakico esaki ta. Y a bay basta specifico cu e posibilidanan ofreci. Y di e grupo cu tabatin obhecion, un total di 112 persona (21.01%) ta pensa cu ta pasobra e ta contra nan religion pa sea casa of registra matrimonio di mesun sexo na Aruba. Un grupo di 187 (35.08%) ta haya cu e ta bay contra nan principio, mientras cu 31 persona (5.82%) ta haya cu e yiunan crea of cu lo biba den un matrimonio asina ta haya problema den sociedad (bully). Tin cu no ta contra nan mes, pero no ta kere cu Aruba ta cla pa esaki. Sea legalmente of emocionalmente. E grupo cu no ta kere cu Aruba ta cla emocionalmente, ta 104 persona (19.51%). E grupo cu ta kere cu legalmente Aruba no ta cla ainda, ta 32 persona (6%). Y tin un grupo cu no tin problema cu ne, pero cu Aruba no ta ni legalmente ni emocionalmente cla pa esaki. E grupo aki ta 67 persona (12.57%). 

MAS DATOS

E grupo cu a participa ta dividi entre 692 (57.81%) hende muher y 505 (42.19%) homber. Y di e grupo encuesta, mayoria ta biba na Aruba, 1130 (94.48%) mientras cu e resto 66 (5.52%) cu a participa na e encuesta, ta biba den exterior. Y pa loke ta edad, e grupo mas grandi cu a participa na e encuesta aki ta entre edad di 30 pa 59 aña (881 persona – 73.48%) sigui pa e grupo di 60-90 aña (161 persona -13.43%), mientras cu e grupo mas chikito tabata di edad te cu 17 aña (14 persona-1.17%).