Sarah Quita Offringa a ricibi su strea riba Walk of Stars

ORANJESTAD - Ocho bes campeon mundial den freestyle windsurf esta Sarah Quita Offringa tambe a haya su strea riba e Walk of Stars na Paseo Herencia. Diamars durante di un atardi ameno den compania di su famia y amigonan mas cercano y den presencia di Gerencia di Paseo Herencia, e atleta Arubano di windsurf esta Sarah Quita Offringa a ricibi un reconocimento unico for di Paseo cu ta reconoce e trabou sublime di nos atletanan local. Sarah Quita a bira e di dos atleta, despues di e pelotero Xander Bogearts, cu tin su propio "Star" na dicho mall, ubica dilanti di e entrada principal. Gerente General di Paseo Herencia, Sra. Valerie Pietersz a hiba palabra unda e la menciona con ehemplar e atleta Sarah Quita ta pa henter nos comunidad. Na banda di ta practica su deporte faborito, e atleta elite a termina su estudio cual ta algo hopi importante den bida. Despues di tur e titulonan mundial cu Sarah Quita a logra, e merece di haya un reconocimento den forma di un strea riba e Walk of Stars. Esaki sigur ta un reconocimento cu ta na su luga mirando cu e anja aki, e atleta Offringa a logra gana su di ocho titulo mundial den e disciplina di freestyle, e di shete consecutivo. Un pabien na Sarah Quita Offringa cu su strea riba e Walk of Stars na Paseo Herencia.