Comercio a cuminsa sinti efecto di impasse riba impuesto

ORANJESTAD – E impasse cu tin aworaki entre Hulanda y Aruba, tin consecuencia concreto financiero comercial manera paramento di pago pa servicionan. “Esaki a cuminsa caba” presidente di ATIA a bisa NoticiaCla diamars. Bo por sinti cu cierto fondo crea pa p.e promocion di Aruba a wordo adapta. “E ta preocupa nos enorme!” Tambe a tende caba cu inversionistanan importante a tuma nota di e situacion y cu ta wantando nan inversion pa mira kico ta pasando. Tur pasobra no tin un presupuesto aproba cu ta pone cu gobierno no por paga su servicionan.

Como comerciante, cosnan mester sigui drai y e tin cu paga su trahadonan. Ya caba gobierno ta dura 90 dia pa paga.” Y si esaki bira 120 pa 150 dia pa paga, bo ta haya bo den problema financiero serio, si gobierno ta un di bo partnernan grandi. “Y gobierno ta un werkgever grandi” van Trigt a sigura. Varios proyecto grandi ta para aworaki aunke cu van Trigt no sa e motibo exacto di esey. E embergadura di esaki tin consecuencia enorme. “Mi ta spera cu nos ta sali for di esaki hopi lihe” van Trigt a sigui bisa NoticiaCla.

Gremionan comercial pues a cuminsa sinti e efecto di e crisis financiero local debi cu e presupuesto no a wordo firma ainda. “Nos ta sumamente precupa pa e consecuencia cu e impasse tin pa nos isla y pa nos economia. E tin efecto riba tur trahado di Aruba segun presidente di ATIA, Ronald van Trigt. Na final di e reunion diamars mainta a formula un carta pa gobierno y tambe gobernador unda cu ta urgi pa resolve e problema aki mas liher cu ta posibel.