Lockdown ta e ultimo recurso pa un di dos ola di COVID-19

ORANJESTAD – Dado caso Aruba haya su mes confronta cu un di dos ola di coronavirus COVID-19, lo no bay resorta na un lockdown mesora manera a haci 3  luna pasa, sino mas bien lo usa esaki com ultimo remedio. Asina miembro di e COVID-19 Crisis Team di Aruba Sharlene Koolman a bisa recientemente durante un briefing. Esaki ta contesta e preocupacion cu e.o. AHATA a expresa recientemente riba e tema. 

PREOCUPACION

Recientemente e asosacion hotelero AHATA a expresa nan preocupacion riba e tema aki, unda cu nan ta pidi gobierno pa no resorta mesora na un lockdown atrobe pasobra e biaha aki e lo tin consecuencia serio economicamente. “Lockdown no ta bay ta nos prome recomendacion na gobierno como medida” Koolman a sigura e biaha aki. “Esey ta bay ta un di e ultimonan, pasobra aworakinan nos ta di opinion como crisis team, cu nos ta miho prepara cu 3 luna pasa”, Koolman a bisa. E lo ta mas bien un di e ultimo consehonan. Tin cierto criterio poni riba papel y prome cu yega na e fase pa cera scolnan y of lockdown pafo y paden, esaki ta medidanan hopi drastico cu a wordo tuma, cu tabata necesario e tempo ey. “Awor tin hopi mas informacion y nos por atende cu esaki debidamente”.