Simar: Mester a scucha docentenan prome cu habri scol 100%

ORANJESTAD -  Gobierno mester a sikiera scucha e docentenan prome cu habri scol 100%. Asina presidente di sindicato di maestro SIMAR, Josephine Albertus a bisa noticiacla.com diamars, despues di a tuma nota cu scolnan awor lo habri 100% entrante otro siman. Segun Albertus, sindicato SIMAR ta compronde cu scol tin cu habri. Pero Albertus ta haya cu mester tene mas cuenta cu maestronan. 

PAKICO NO A WARDA

Segun Albertus, a splica e crisis team siman pasa cu docentenan a haci hopi trabou pa por habri scol bek riba 50%, pa bin tende awor cu den un siman, ta anuncia cu ta habrie pa 100%. “Pakico no a warda?” Albertus ta puntra. Segun e sindicalista, docentenan a traha den weekend, usa nan mesun placa, sinta hunto pa traha e protocol pa por yega 50%, full un plan di enseñansa pa por duna les  te fin di aña escolar, y pa wak den un siman tur e trabou cu nan a haci, no ta alcaso mas, pasobra desde otro siman tur mucha ta na scol. 

ESFUERSO DI DOCENTENAN

“Esey nos ta bisa ta jammer, y ni pa bisa nan danki pa tur nan esfuersonan cu nan a haci. No. Ta djis bisa cu scol ta bay habri otro siman y that’s it” Albertus ta bisa. “E ta un sla duro pa nan. Nos ta compronde cu scol tin cu habri, nos ta eens cu esey. Nos no ta bisa cu no ta asina pero toch, hacie na un manera bon, den overleg. Sinta wak cu nan, con e siman aki a bay, kico nan ta pensa “ Albertus a bisa.