SVOA ta desmenti supuesto irregularidadnan na Colegio Arubano

ORANJESTAD – Stichting Voortgezet Onderwijs Aruba (SVOA) debidamente ta cumpli cu reglanan stipula pa ley di contabilidad. E fundacion asina ta reacciona e.o. riba un noticia cu a keda publica den prensa den fin siman, cu e ta considera eroneo. E tema tabata supuesto ‘ conflicto di interes den Colegio Arubano’. “SVOA ta lamenta cu informacion erroneo ta sali den publicidad, atachando no solamento nos Bestuur pero tambe nos empleadonan sin busca pa sa con en realidad procesonan interno ta wordo canalisa”, e comunicado ta sigui bisa. “Specificamente e fondo di buki (boekenfonds) tur aña enberdad ta manda pidi offerta nan na diferente companianan local y na Hulanda door cu tin diferente editornan.  SVOA nunca a pidi oferta ni tawata tin intencion di pidi oferta serca of via di ningun miembro di Bestuur” e comunicado ta continua bisando. 

Tambe, SVOA ta bisa di ta cumpli cu reglanan stipula pa ley di contabilidad y alabes esey ta wordo controla tur aña pa un compania registra di contabilidad den cuadro di “good governance”. Despues cu bukinan financiero di SVOA wordo controla y aproba esaki ta wordo entrega na Minister di Enseñanza, Ciencia y Desaroyo Sostenibel, Departamento di Enseñansa, Departamento di Finansas, Algemene Rekenkamer y Centrale Accountantsdienst. “ Ultimo esaki a sosode na aña 2019 unda a entrega e reporte financiero pa aña 2018 y na e momentonan aki SVOA ta finalizando e reporte pa aña 2019. SVOA su empleadonan semper a traha naar eer en geweten y no por permiti ningún irregularidad financiero” e comunicado ta finalisa bisando.