Si mayornan no manda yiunan scol otro siman, esaki lo tin consecuencia

ORANJESTAD – Ora cu scolnan basico y preparatorio habri 100% otro siman na Aruba, pero e mayornan dicidi toch cu no ta hiba mucha scol, e lo tin consecuencia pa e mayornan. Asina a compronde di prome minister Evelyn Wever Croes dialuna anochi durante e briefing riba Coronavirus. “Bo ta perhudica e mucha door di no lag’e bay scol” Wever a bisa noticiacla.com dialuna anochi. A puntra e mandatario, si tin consecuencia pa mayornan si nan toch tin miedo ainda pa hiba nan yiunan scol. Y e contesta pues ta si. A anuncia cu bureau leerplicht tambe ta informa di e situacion. 

PROBLEMA

“E mayornan cu tin problema serio cu manda nan yiunan scol, pasobra sea e yiu ta vulnerable, bay semper den contacto cu scol, pa asina bo yega cu palabracionan” Wever a manda bisa e mayornan. Esey por ta e unico forma cu lo no tin consecuencia pa e mayor y muchanan si nan no bay scol. “E no ta vrijblijvend, e no ta pa esun cu kier bay pasa pret ta bay” Wever a sigui bisa. “Mayornan cu kier stroba e muchanan di esaki (bay scol:red), mi ta spera cu nan tambe por coopera”. Si tin motibonan valido (pa e mucha no bay scol:red), tuma contacto cu e scol. 

CAMBIOInicialmente ora cu a anuncia reapertura di scol pa 18 di mei recientemente, esaki tabata mas ‘liber’. Esaki den sentido cu mayor no tabata obliga di haci esaki. E mandatario a bisa te hasta cu no ta pone un revolver na cabez di e mayor pa hib’e scol. Pero cos a cambia mientrastanto for di e tempo ey, y a delibera cu docternan cu a sigura cu no tin ningun riesgo serio pa e alumnonan. Como tal hasta leerplicht ta informa, cu ta nifica cu mayornan sin motibo valido, no por tene nan yiunan na cas entrante otro siman. No ta conoci si e control di leerplicht ta optimal y cu si en realidad por y ta controla esaki.