Temporada di horcan pa 2020 a inicia awe y ta mustra feroz

MIAMI – Temporada di Horcan a cuminsa awe dialuna y cos ta mustra intenso segun pronosticonan presenta. Expertonan riba e tereno aki ta pronostica por lo menos 19 tormenta cu nomber. Di esaki entre 6 pa 10 por bira horcan (tormenta cu biento mas fuerte cu 74 miya pa ora) y di esakinan 3 pa 6 por bira horcan serio (biento mas hopi cu 111 miya pa ora). Un temporada ‘averahe’ ta repasa 12 nomber tur aña, di cual 6 ta bira horcan. 

NOMBERNAN DI TORMENTA/HORCAN PA 2020

TORMENTA TREMPRAN

E indicacion di un temporada serio a bin caba ora cu ya prome cu e temporada cuminsa, tabatin dos tormenta caba cu a nace, esta Arthur y Bertha. Y ta parce cu e siman aki caba e di tres (Cristobal) por desaroya. Tur aña e organizacion mundial di meteorologia WMO ta saca un lista di 21 nomber. Nan ta varia entre nomber di homber y muher. Si un aña un horcan causa daño serio, ta retira e nomber ey. E ultimo temporada cu tabatin 4 horcan serio, tabata na 2017, unda cu a mira Harvey, Irma y Maria. E ultimo dosnan a haci hopi daño na Isla Riba.