Indicacion cu contracto di director Telearuba no ta wordo renoba

ORANJESTAD – Director actual di Telearuba, Toko Winklaar, no ta bolbe na januari 2015. Por lo menos esaki NoticiaCla.com a haya confirma di su fuentenan serca di esnan envolvi cu e proceso aki. E contracto di Winklaar ta vence dia 31 di december, esta diaranson awor, y decision lo a cay pa no extende esaki mas largo. No ta conoci exactamente ken lo bira su remplasante. Mas sigur cos ta mustra cu e number dos actual lo por tene e puesto pa un periodo cortico, te ora cu esnan encarga cu maneho di e planta dicidi e siguiente paso.

Informacionan ricibi ta mustra tambe cu como posibilidad pa bira e proximo director, tin e actual director di noticia actual di e planta, Lelicia Tromp, aunke no ta descarta cu Setar (actual doño di e planta) por trece un otro persona di pafo pa maneha e canal. Si Tromp mes haye, esaki lo no ta mesora, sino mas bien lo uza un periodo pa ‘werk e in’ den e funcion importante aki. Tur esten, lo tin un maneho for di Setar, sea cu e actual di dos den funcion, Rona Tromp of un otro persona den Setar.

Manera ta conoci, e contracto inicial di Winklaar mester a vence na juni ultimo. Eynan tambe tabatin hopi speculacion e tempo ey di e futuro di Winklaar na e planta. Na final sinembargo, decision a cay cu ta duna Winklaar un periodo extra di 6 luna, pendiente su maneho. E periodo aki a vence y pa otro siman,  lo tin otro maneho den e canal. Ki cambio esaki lo bira, no ta conoci, ni con lo implementa esaki.

Den e planta mes, oficialmente tin un silencio hermetico, y cu e trahadonan mes no ta na altura di kico por pasa. Hecho ta cu 31 di December awor ta su ultimo dia den funcion como director. “ Y no ta e intencion pa e keda como director”, e fuente a sigura NoticiaCla.com. Despues di 31 di december lo mira kico ta kico den e planta nacional.