Ex minister ta considera denuncia contra dje di como 'cantidad di nonsense'

ORANJESTAD – Ex minister Otmar Oduber a bisa noticiacla.com dialuna mainta cu e denuncia di Fundacion Nos Ta Aruba contra dje, ta un ‘cantidad di nonsense nan’. Ademas Oduber a bisa inicialmente cu e no ta na altura di e denuncia. Ora cu a confronta Oduber cu e cargonan, el a bisa cu e casonan menciona ‘no ta berdad’ y cu nan no ta cuadra. Oduber a retira aña pasa di politica. Segun Oduber, ta un campaña di difamacion tin contra dje. 

E CASO

Recientemente e fundacion menciona, a haci un denuncia cerca Ministerio Publico contra Oduber, alegando por lo menos 9 caso relaciona cu corupcion, fraude, abuso di poder cometi grandemente pa e ex mandatario. 

CASO IBIS

E fundacion su presidente, e conocido activista Alfred ‘Michael’ Williams ta bisa cu nan ta bringa pa un ‘miho Aruba’. Segun Williams, ta a base di nan investigacionan, ex minister Paul Croes a keda persigui y sentencia pa traficacion di permiso di trabou.  

E CASONAN

E denuncia ta contra 9 posibel actonan castigabel contra Oduber y 6 otro persona den su circulo inmediato. Ta culpa Oduber e.o. di enrikisimento via ley di Serlimar, cu compra di un incinerador. E lo a ricibi 20 miyon na soborno. Oduber lo a sigui cu e practica di ex colega Paul Croes. Tambe Oduber lo tabatin un rol central den traficacion di oro, droga y hende via e aeropuerto chikito Universal Terminal unda cu lo ‘no tabatin control di entrada y salida di hende’. Y asina tin un cantidad di acusacion mas.

NO TA PROME DENUNCIA

No ta prome denuncia cu Williams ta haci contra e ex mandatario. Na 2018 caba, el a haci un denuncia publico contra Oduber, aunke no a haci e denuncia na ministerio publico. Na e occasion ey, Oduber a hiba Williams corte pa prohibi Williams di sigui haci declaracionan asina pasobra el a haya cu e declaracionan haci por tabata malo pa e proyecto di dump. Corte no a dune rason den e caso ey y a permiti Williams sigui papia. Pero Oduber a bisa e tempo ey na e portal aki, cu den e mesun caso, aunke cu no a logra stroba Williams di papia, cu no tabatin nada coruptivo cu Oduber a haci. 

Lesa e documento completo di e denuncia actual AKI.