Demanda pa Arubianonan na Hulanda bolbe Aruba ta halto

AMSTERDAM – E demanda pa Arubianonan bolbe Aruba for di Hulanda ta halto. Asina minister plenipotenciario pa Aruba na Hulanda Guilfrend Besaril a confirma pa noticiacla.com diabierna mainta. Un mensahe cu a post riba e pagina di facebook di Arubahuis a hala atencion:” Gobierno di Aruba ta den deliberacion pa pone un vuelo disponibel di Hulanda pa Aruba. E dia exacto di e vuelo di KLM di Amsterdam pa Aruba no ta sigur ainda. “Sinembargo nos ta haci un yamada na tur Arubiano cu ta residente (ingezetenen) di Aruba y cu ta desea di regresa nan pais, pa registra na e email regresoaruba@crisis.aw” e comunicado ta bisa. 

E SITUACION

Segun Besaril, tin un situacion cu a surgi tambe ora cu frontera a cera. Ta trata di studiantenan cu a sea keda cla cu nan estudio, of ta young professional’s cu a haña un oportunidad di trabou na Aruba, pues un contrato of hobennan cu pa un of otro motibo no kier keda Hulanda mas. Problema ta cu ora cu e grupo aki (cu a haya contract di trabou), no a logra subi avion prome cu frontera a cera riba nan y nan a keda pega. Comotal, gobierno ta dispuesto awor pa considera e grupo aki tambe como ‘ingezetenen’ y lo yuda nan biaha tambe. 

MOTIBONAN 

E motibonan di e grupo di ‘ingezetenen’ ta varia segun Besaril. “Sea nan a bini pa atencion medico y ta cla pa regresa, of ta (manera a bisa caba) studiantenan cu a caba y tin oferta di trabou na Aruba of simplemente kier bai bek cas paso cos ta ‘berans’ tambe na Hulanda”.  Pa loke ta e informacion cu a keda postula riba e pagina di Facebook di cas di Aruba, esaki ta bisa : “Asina cu e fecha di e vuelo ta conoci, nos lo publica esaki via Facebook. Pa cualkier pregunta por tuma contacto cu Arubahuis via e numbernan di telefoon 070-3566200 of via 070-2002293” . Pa loke ta e lista di esnan cu ta biaha, Besaril a bisa cu ta haña e lista di esnan cu ta bai definitivo na momento cu evuelo keda regla. Esey no ta cla ainda.