KLM cla pa cuminsa buelonan comercial pa islanan ABC atrobe

SCHIPHOL - KLM kier cuminsa bula bek pa islanan ABC y St Maarten pa comienso di luna di juni awor. Asina su hefe grandi Pieter Elbers ta bisa den un entrevista pa Luchtvaartnieuws Magazine. “Nos kier  start e netwerk mas aleu y ta wak demanda pa pasashi for di e mercado ey” Elbers ta bisa. “Cu tur medida necesario abordo y riba tera, nos ta haci esaki mas sigur posibel”. Durante e coronacrisis KLM a keda bula riba e islanan menciona pa transporta carga, ayudo medico y tambe pasaheronan cu kier a repatria. A bula por lo menos 20 buelo pa busca Hulandesnan pega y tambe esnan di e islanan. 

START CU CONDICION 

Awor KLM ta tuma e siguiente paso. Entrante 3 di juni, KLM lo cuminsa conecta Aruba, Bonaire y St Maarten tambe cu Schiphol. Pa tur e islanan aki, ta posibel awor pa bula bay Hulanda pa esnan cu kier bolbe nan pais. Pero pa esnan cu kier biaha for di Hulanda, ta depende di e restriccion di e islanan respectivo. Aruba su frontera ta cera y ta premira pa habri esaki entre 15 di juni pa 1 di juli.  Unabez cu e habri su frontera, lo cuminsa bende pasashi.  

BUELONAN VIA CORSOU

E buelonan pa e islanan, lo bay cu un stop via Corsou y KLM lo usa e Airbus A330.