Curpa di pasaheronan di buelo AirAsia recobra awe mainta

DJAKARTA – Trahadonan di rescate indones a recobra por lo menos 40 curpa di pasaheronan di e avion di AirAsia cu a crash diadomingo den laman entre islanan Borneo y Sumatra. Esaki a keda confirma pa marina indones awe mainta. Prome a localisa partinan di e avion cu tabata drief den laman. Entre nan, tabatin dos obheto grandi oranjo, blanco y shinishi. Tambe tin fotonan saca di obhetonan cu ta parse salbabida, un porta di avion y un salida di emergencia di avion. Mes momento por a mira imagennan televisa di curpanan cu tabata drief den laman.

Durante un conferencia di prensa, transmiti pa television indones, autoridad a mustra algun di e obhetonan recobra.

Director di AirAsia, Tony Fernandez pa medio di su cuenta di twitter, a manda palabra di condolencia na famia di e victimanan di buelo QZ8501. “Mi curazon ta yena cu tristesa pa tur famia di QZ8501. Na nomber di AirAsia, mi palabra di condolencia pa tur hende. Palabra no por describi con tristo esaki ta” Fernandez a sigui bisa.

Tabata diadomingo marduga cu e avion a wordo raporta como ‘perdi’, minuutnan despues cu e capitan di e buelo a pidi cambio di direccion y altura, debi na mal tempo. Despues di 4 minuut, no a tende nada mas di e avion. Despues di tres dia di buskeda, a bin localisa parti di e avion y e curpanan menciona.