WEB: Awa cu scuma for di cranchi na Bushiri no ta peligroso

ORANJESTAD - Tecniconan di WEB ta  ta spulando e tuberia den area di Bushiri. Esaki ta necesario pa mantene e calidad y e fluho continuo di awa den e area. Debi na e crisis di corona, tawatin hopi menos consumo di awa den e area di hotel pa mas cu dos luna largo. E spulamento di e awa ta necesario pa purifica e tuberia pa asina e calidad di e awa no wordo afecta. Den situacionnan asina, ta usual cu WEB ta notifica Santa Rosa pa asina nan trucknan por colecta e awa y haci bon uzo di dje. Debi na e spulamento, habitantenan den e area lo por nota cu e awa ta sali cu scuma for di cranchi (awa ‘lechi’). Esaki no ta dañino pa salud di hende. Ta pidi habitantenan cu ta nota algo otro na e awa, por ehempel cambio den holor of color, pa mesora tuma contacto cu WEB, na 280-4600. Tambe ta haci un apelacion na doñonan di edificionan cu tawata cera pa largo tempo, pa ora di reanuda operacion, pa laga e awa core un tiki prome cu uz’e.