Encuesta: Mayoria kier biaha bek ora frontera habri pero no tur destinacion

ORANJESTAD – Mayoria di usuarionan di Noticiacla.com encuesta, ta cla pa biaha mesora, asina frontera habri, pero e pais mester tin e virus bou control si. Asina un encuesta entre e usarionan ta bisa. Un total di 839 persona a participa na e encuesta aki. Pa mayoria, ta importante pa e aeropuerto y e aeroliña tambe ta mantene nan mes sigur pa cu higiena pa cu COVID-19. Y mondkapje pa algun no tin sentido. E encuesta tin 5 pregunta basico. 

PATRONCHI DI BIAHE

E gran mayoria (302) persona cu ta  36.34% ta cla pa biaha mesora. E siguiente grupo ta cla pa biaha, pero ta prefera pa warda te otro aña. Esaki ta 266 persona cu ta 32.01%. Pero tin un grupo tambe cu tin miedo pa biaha awor (134) cu ta 16.13%. Un otro grupo ta bay biaha pasobra simplemente nan no tin placa awor pa haci esaki. Nan ta 124 persona (14.92%). Y un grupo chikito (5), no ta gusta biaha mes. 

MOTIBO DI BIAHE

E motibo di biahe tambe ta importante. Esaki por ta pa vacacion of pa trabou. Aki gran mayoria a bisa cu nan lo biaha pa vacacion so (402) cu ta 62.52%. Un grupo Segundo lo biaha pa tanto trabou y vacacion. E grupo aki ta 137 (21.31%), y e grupo mas chikito ta bisa cu nan lo biaha pa trabou so. 

KICO TA IMPORTANTE PA TENE CUENTA 

Pa esnan cu ta biaha, a puntra nan kico ta importante pa considera ora di biaha. E grupo grandi (702 persona) cu ta  93.98% a bisa cu avion y aeropuerto mester brinda tur posibilidad di seguridad y limpiesa posibel. E otro grupo ta bisa cu esey no ta importante. E grupo ey ta 45 persona cu ta 6.02%. Entre e cosnan importante porta cu e biahero (abo) tin cu tene cuenta cu ne, ta mondkapjes.

Mayoria di esnan encuesta, no tin problema pa bisti mondkapje si e aeroliña pidi esey. Esey ta 626 (80.57%). Mes momento, un grupo mas chikito, no ta dispuesto pa bisti esaki na aeropuerto tambe, sino solamente den avion. E grupo ey ta 113 (14.54%). Y tin un grupo cu simplemente no ta kere den bisti mondkapje, pasobra e no ta yuda. E grupo ey ta 38 (4.89%).

PAISNAN CU AINDA TA AFECTA

Mientras cu abo kier y por biaha y frontera di bo pais ta habri, tin paisnan cu ainda no tin e situacion bou di control. Y porta un di e destinacionan aki ta net esun cu abo kier bishita. Aki tambe a puntra e importancia di e detaye aki. Gran mayoria (577, cu ta 76.22%) a bisa cu e pais cu nan tin cu bishita, mester tin e virus bou di control. Un otro grupo a bisa, cu ni maske e aeroliña ta ofrece buelo pa e destinacion ey, nan lo no bay. Esaki ta 116 persona cu ta 15.32%. Y 64 persona no ta haya esey importante, esta si e destinacion tin e virus bou di control. Esey ta 8.45%.