Turista cu test positivo pa COVID-19 lo bay den isolacion

ORANJESTAD – Turistanan cu yega Aruba y test positivo pa COVID-19 lo bay den isolacion. Esaki por dura un periodo di 2-3 siman. Asina minister di turismo Dangui Oduber a confirma pa noticiacla.com riba e situacion unabes cu Aruba habri frontera. Pero no ta asina cu tur turista cu yega Aruba, automaticamente tin cu bay den cuarentena pa 2 siman. Lo screen tur, pero test solamente esnan cu tin simptoma, y actua corespondiente. 

TURISTANAN TA AVISA

Hopi ta puntra si un turista lo kier biaha pa un destinacion vacacional, pa bin haye den un situacion unda cu e por haye ta pasa su prome dianan den cuarentena, enbez di ta na un beach na hotel. Segun e minister encarga, e posibilidad aki tey. y pesey lo tin cu avisa e turista prome cu e biaha pa Aruba. “Esaki sigur lo mester wordo comunica na e turista adelanta paso imagina bo (cu) e turista ta paga pa un Ritz Carlton y ta ‘end up’ den un otro hotel di menos luho of otro designated accomodation. Nan mester ta consiente tambe di e risico aki” e mandatario a sigui splica.

E PROCESO

E proceso ta cu ora cu unabez e turista yega Aruba ora frontera habri bek, e ta wordo ‘gescreened’. E screening ta encera un thermal camera y sesion di pregunta, cu por determina e tin simptoma di e virus of no. Unabez resulta cu e tin e simptomanan, ta haci un test liher pa wak si e ta positivo. Segun Oduber, e turista en cuestion mientrastanto tin cu warda su resultado na aeropuerto mes. “ Pesey kier introduci e Rapid PCR test cu ta duna resultado relativamente liher den comparacion cu e otro test regular”. Si e turista test positivo, ta transporte pa un acomodacion designa pa e proposito di cuarentena of isolacion. Actualmente A.T.A ta trahando riba esaki. Si logra, lo apunta ambos propiedad como tal. No a keda cla sinembargo ainda cu esaki. “Esaki no ta facil” Oduber a admiti na e portal aki. 

KICO TA UN ACOMODACION DESIGNA

E mandatario ta splica cu un ‘acomodacion designa lo ta lugar cu ta brinda accomodacion regular pa turistanan cu a test positivo y cu no mester cuido medico na hospital. “E lo fungi como e accomodacion di isolacion pa turistanan.   E meta di e designated location lo ta pa ‘vang op’ turistanan cu test positivo y esaki lo perdura tanten cu nos ta ricibi turistanan y no tin vacuna.

GASTONAN MARA NA ESAKI

Esaki naturalmente lo trece gastonan cune. “E gastonan ta halto, por pensa riba gasto di un eventual estadia na hospital si e turista mester cuido medico, gastonan di accomodacion, gastonan di transporte. Tin algun opcion con lo cubri e gastonan aki pero no kier adelanta riba esakinan” Oduber a continua bisando. Riba insistencia di e portal aki, e mandatario a los esaki e ora di ken ta cubri e gastonan. “ Nos tin 3 opcion cu ta wordo discuti. No a tuma un decision ainda cua e ta bira”.

REALIDAD

Cu reapertura di frontera, e realidad ta keda cu entre e turistanan cu yega, por tin cu ta contagia cu e virus. Y pesey mientras ta cla pa habri, mester ta prepara pa tur posibilidad.