Mayoria di esnan encuesta, ta contra eliminacion di Toque de Queda

ORANJESTAD – Un mayoria di usuarionan di noticiacla.com cu a participa den un encuesta di 1 dia, no ta content cu gobierno ta bay elimina e Toque de Queda diahuebs awor. Den e encuesta unda cu 1.406 usuarionan a participa, 63% (880) a bisa cu nan no ta di acuerdo. Un grupo mas chikito di 526 usuarionan (37%) si tabata contento cu a dicidi cu ta bay kita e toque de queda. 

TOQUE DE QUEDA

For di 21 di maart 2020 gobierno a implementa e toque de queda pa ta di 9’or di anochi pa 6’or di mainta. Y durante tur e tempo, polis tabatin su man yen cu detencion. Esaki finalmente despues di 2 luna, a cuminsa mengua te yega 0. Despues di un periodo, a cambia e orario di e TDQ. Un luna despues, via un encuesta di e portal aki, un cifra casi igual den porcentahe (67%) a vota pa un toque de queda total, y un grupo menos (33%) a bisa cu no. Dos siman pasa ainda, gobierno a bisa cu ‘por lo pronto’ lo no a kita toque de queda, riba pregunta di e portal aki. Pero e situacion di e casonan a bira di tal forma cu segun gobierno, tabata necesario pa ahusta e medidanan. 

CRIMEN Y ATRACO

E pregunta ta si esnan cu a vota pro pa keda cu e toque de queda, kier esaki pa motibo di COVID-19 ainda of si ta pa seguridad. Seguridad den caso di robo, atraco y accidente. Por a nota cu for di momento cu a suavisa e orario, atraconan a cuminsa, y tambe accident. Den cuadro di esaki, por bien ta cu e motibo ta cu kier pues pa mantene e regla, pero pa otro motibo. Pero ta mustra cu gobierno no tabata por a adapta esaki legalmente pa cubri nan mes cu e toque de queda, pa e haya un otro motibo, cu no ta COVID-19.