Proveyer: Habri scol bek ta un reto pa busca e miho forma

ORANJESTAD – Scol mester a cuminsa habri siman pasa, e siman aki y otro siman. Hopi hende sinembargo ainda tabatin miedo pa manda nan yiu(nan) scol. Gobierno di su banda a purba convence comunidad cu ta safe pa esaki sosode. Segun director di Directie Onderwijs Annemarie Proveyer-Groot, loke ta ‘leidend’ den e desicionnan tuma pa habri scol of no ta DVG su conseho cu ta pa percura pa salud di tur hende na scol, mantene mastanto distancia social, gruponan chikito y hygiene na scol.

RETO

E ta un reto segun Proveyer, pa enseñansa busca e mihor forma pa organisa esaki cu e mesun cantidad di maestro y mucha y e klasnan/ruimte cu tin. Segun e director, tur directiva di scol cu nan cabesantenan y maestronan ta duna di nan parti pa purba yega na e mihor formato sirbiendo y cuidando e mucha/studiante. “ Nan mester sosten den esaki di nos tur pasobra tin challenges manera con ta sigui cu e diferente mucha den un klas cu cada un a haya  of no a haya enseñansa den e ultimo dos luna cu a pasa, exigencianan riba tereno di hygiena, problemanan/traumanan cu muchanan por a pasa aden dor di situacion di famia......etc”. 

PREPARA PA AUGUSTUS

Directie Onderwijs ta deliberando hunto con pa haci’e a corto plazo pero mester prepara tambe pa augustus y e aña escolar nos dilanti. “ Cada scol ta otro y lo mester soluciona otro retonan, mirando e bario unda e scol ta ubica, e team di maestro cu ta traha na e scol, con bieuw e scol ta etc etc. Una vez cu e analysis a ser hasi di e puntonan aki riba por planea con pa bay duna e enseñansa y pa esaki tin diferente forma. Hecho ta cu scol mester habri su portanan pa duna nos muchanan e enseñansa y sosten pa siña y desaroya nan mes na un manera sano” Proveyer a sigui bisa.

CON SCOL LO TA NA AUGUSTUS

Pa loke ta kico mester sosode tempo lo mustra cu organisatoriamente no ta posibel pa bay bek na e modelo di enseñansa prome cu a sera scol na Maart. “Eerste schooldag den e siguiente schooljaar ta 20 augustus 2020, bunita fecha y nos meta ta pa entre awor y e dia ei traha na un modelo di scol nobo cu ta sirbi nos yiunan den e añanan nos dilanti mirando e situacion rond di Corona” Proveyers ta bisa . Tur esaki ta teniendo cuenta cu e direccion cu Directie Onderwijs kier bay aden cu nos enseñansa di cua e base por wordo haya den PEN 2030.

MIEDO

Manera indica na comienso, na e momento aki segun Proveyer, tin hopi miedo entre nos mayornan y maestronan pa cu COVID.Como comunidad nos mester duna esei prome un luga. Mester splica hopi cla kico por wordo spera y con por prepara pa esaki pa otro ana escolar.Bida ta sigui segun e director, y nos mester ta cauteloso pero tambe realistico y prepara pa Enseñansa por sigui. “ Es mas siñamento mester bira parti di nos bida mirando con rapido nos mundo ta cambia. E pregunta ta unda y con siñamento mester tuma.luga”. 

“Enseñansa a claim siñamento dor di bisa cu esaki ta tuma luga den un edificio cu yama scol, pero nos ta siña tambe na cas, via tv, radio, via facebook, riba internet, via webinars, corant, e-learning, charla etc. Pregunta ta ki calidad loke nos ta siña tin.Ta importante pa educa nos pueblo riba precies esaki. Kico ta di calidad y kico no ta bale la pena pa scucha, mira, lesa, siña .Y nos mester brinda nos comunidad calidad” Proveyer a finalisa bisando.