Proveyer: Con a yega na idea pa tin scol algun dia pa siman so

ORANJESTAD – E plan pa reduci orario di scol den klas e proximo aña escolar, cu a bira conoci recientemente, y te hasta causa consternacion, ta un plan cu enberdad Directie Onderwijs a traha y cu minister di enseñansa Rudy Lampe a aproba. Asina director di Directie Onderwijs Annemarie Proveyer-Groot a confirma pa noticiacla.com. 

PUNTO DI SALIDA

E conseho aki ta basa riba e punto di salida cu scolnan mester tene cuenta cu e exihencianan di dvg den e temporada di covid y enseñansa mester sigui. scolnan lo mester traha cu gruponan chikito, cu e team di maestro cu por traha y cu e medionan cu tin. Saliendo for di e punto di bista aki enseñansa lo por a draai den e forma proponi. E conseho aki naturalmente mester wordo elabora ainda riba puntonan concreto manera: kico ta hasi cu e muchanan cu no por keda cas, cu e muchanan cu no tin devices, cu esnan cu mester haya extra ayudo p.e. cuminda cuido.

CRISIS TEAM TA DICIDI 

Pero, mientras cu Lampe a aproba e conseho (cu ta toca solamente e parti di enseñansa. No e otro actividadnan cu ta sosode na scol segun Proveyer), Proveyer a bisa mesora si cu den caso di crisis e crisis team cu minister presidente ta na cabez, e ta esun cu ta determina si ta aproba esaki of no. Y Noticiacla.com a compronde cu esaki no a keda aproba.

CON E IDEA A NACE

Segun e director, e idea ta di e propio minister Lampe. “Minister a pidi advies pa loke ta trata enseñansa, kico por ta un modelo con pa sigui den e aña escolar nobo, mirando cu por lo pronto lo mester tene cuenta cu COVID 19 lo ta den nos comunidad” Proyever a bisa. “E advies ta basa riba e asumption ey”. E ta sigura cu a haci cierto investigacion riba e tema. “A compara modelonan di diferente pais y a mira e exigencianan di e.o. Rampenbureau, DVG y e situacion na Aruba pa yega na e advies aki. Corda cu ta trata e advies pa enseñansa y no ta trata di cuanto dia scol ta habri” Proveyer ta clarifica.