Baluarte di Cultura “Lio” Booi hiba na su ultimo lugar di sosiego

ORANJESTAD – E baluarte di cultura di Aruba, Hubert “Lio “ Booi a wordo hiba na su ultimo lugar di sosiego awe dialuna. Despues di un programa extenso cu a cuminsa for di diasabra, esaki a termina cu e entierro na Pro Catedral San Francisco. Notable presentenan tabata entre otro e ‘alumno’ di tur tempo di Booi, esta Ito Tromp. Cu morto di Booi, Aruba ta perde den un corto tempo dos hende di peso, cu a yuda dirigi Aruba su cultura den diferente direccion. Hildward Croes (q.e.p.d) cu a dune un toke moderno, y Booi, cu a inmortalisa e.o. e himno di Aruba cu su di tres couplet, y varios poema cu te awe ta keda zona tur caminda y ta uza den e bida diario di nos arubiano.

Prome cu a hiba Lio Booi pa e Pro Catedral San Francisco tabatin un ruta riba caminda cu e Shersh. A sali  for di Olive Tree na Cumana den direccion retonda di Aereopuerto bin pa Camacuri,  Retonda Las Americas despues drenta Stadionweg ( lo bira Caya Huberto Obdulio (Lio) Booi) banda di Cas di Cultura den direccion Oficina di UNOCA unda cu a para un rato 1 pa 3 minuut. Aki directiva di Unoca a haci un entrega floral...pa sigui riba Caya Avenida Milo Croes, yega retonda Banco di Caribe sigui riba De La Sallestraat bini abou,  y para na su cas riba Kamerlingh Onnestraat # 27 (2 min.). Finalmente a yega Pro Catedral pa 12:45 pm.

Tabata un siman pasa cu NoticiaCla.com a relata cu e baluarte di cultura di Aruba, Hubert “Lio”Booi a bay sosega. E tabata malo pa algun tempo y a fayece den hospital. Booi, boneriano di nacemento (1919), a considera su mes Rubiano for di tempo cu e la bin biba na Aruba, integrando su mes completamente riba nos isla. Booi, fuera di tabata poeta, tabata pintor y musicante tambe. Su trabou mas grandi, pero porta no hopi conoci, ta e di tres couplet di e himno di Aruba, Aruba dushi tera.

Booi a nace na Nikiboko na Bonaire riba 25 di juli 1919. E la atende scol basico na Bonaire y cu 18 aña a bin biba na Aruba na 1937. E la casa cu Floraquetina Coronel(q.e.p.d) y tin 6 yiu. Un homber y 5 muher di cual porta esun mas conoci ta Ludwina. Booi a traha den gobierno na e.o. WEB, oficina di turismo, y despues servicio di informacion di gobierno (BUVO awe). Pa 15 aña e la maneha Instituto di Cultura di Aruba. Finalmente na 1980, Booi a bay goza di su pensioen bon mereci.

Su carera artistico nunca no a para. Premionan tambe e la gana y haya na cantidad. Entre nan e Premio di Papiamento na 1999. Un honor grandi tabata ora cu na 2003, Cas di Cultura a nombra e plenchi paden na su nomber, Plaza Hubert Lio Booi. NoticiaCla.com ta manda palabra di forza pa su famianan y cu e baluarte di cultura sosega na paz. Foto cortesia bibilioteca publico di Aruba.