Segun minister Lampe e no tin miedo di un mocion di desconfiansa

ORANJESTAD – Un minister basta emocional na final di su discurso diamars mainta  a bisa cu e no tin ningun miedo pa confronta un posibel mocion di desconfiansa durante un reunion awe mainta. Ta trata aki di minister Rudy Lampe. E mandatario a ‘duna cuenta’ na Parlamento riba su plannan di enseñansa debi cu tin hopi ‘turbulencia’ riba e tereno aki ultimo tempo. Pero delanta tabata circula cu fraccion di oposicion (AVP) lo a entrega un mocion di desconfiansa contra dje na final di e reunion. Na final di su disertacion, e mandatario a referi na e ‘menasa’ aki y a confronta e fraccion berde. Y den esaki, e mandatario a bisa cu e plan di inovacion di enseñansa, lo sigui cu of sin e mandatario en cuestion. 

MOCION DI DESCONFIANSA

E mandatario a bisa cu e ta na altura cu tin un mocion di desconfiansa cu ta colga riba su cabez. E la confronta esaki cu varios palabra indicando e.o. cu e ta prefera perde su funcion di minister, cu ta na e banda robez di historia. Ademas, e no kier ta un minister popular, pero ta para na banda robez di historia. Asina el a keda duna mas ehempel, pakico e no tin miedo pa confronta e posibel mocion di desconfiansa. 

POSIBILIDADNAN

Mientras cu enberdad tin un mocion ta ‘colga’ riba cabez di e respectivo minister, e posibilidad cu esaki lo pasa, no ta sigur. E fraccion cu por presenta e mocion, ta AVP cu tin 9 asiento. Esey no ta suficiente pa pasa un mocion. Mientras cu tin descordia den fraccion di MEP contra prestacion di minister Lampe, un voto di desconfiansa contra e mandatario, lo por crea un division cu por conduci na un eventual caida di gobierno. Esaki si RED (e partido di minister Lampe) como partner di coalicion, ranca e plug, y fraccion di MEP no haya sosten di e.o. parlamentario Daphne Lejuez como independiente, y partido POR su dos miembronan. Si partido MEP di otro banda no vota pro e posibel mocion, nan eventual disgusto contra e mandatario ta practicamente disparce ya cu no vota pa e mocion, por keda interpreta cu nan ta sostene e trabou di e minister concerni. Na final di e reunion, lo mira si e mocion di desconfiansa ta keda presenta y mas importante, si e ta wordo aproba of no.