Ruiz-Paskel: Maneha DIMAS den tres edificio tabata un reto

ORANJESTAD – Despues di tabata sera pa 13 siman largo, edificio di DIMAS/DAO ta habri su porta dialuna 5 di januari atrobe. Y cu e speransa cu e biaha aki si e edificio lo keda habri, sin problema di salud pa e trahadonan. Un comision a reuni y a recomenda ministernan concerni recientemente, cu e edificio por habri bek, segun directora di DIMAS, Kathy Ruiz-Paskel na NoticiaCla.com dialuna. Segun Ruiz, e tempo tras di lomba no tabata facil, y uno yena di retonan. Pero, nan ta cla pa muda bek y duna e servicio cu nan ta custumbra di duna. E reto awor ta pa por ‘haal in’ e atraso di permiso den e proximo 6 pa 8 siman di tempo. Y Ruiz tin tur confiansa cu esey lo sosode tambe.

TRES EDIFICIO

Reparti 95 hende den tres diferente edificio, -sin un infrastructura di comunicacion apropia- , tabatin su retonan sigur segun Ruiz a sigui bisa NoticiaCla.com. For di momento cu nan mester a bandona e edificio ‘nobo’ y duna espacio pa expertonan traha riba e problemanan, a haya un solucion 'temporal'. Opera for di 3 diferente edificio y localidad aunke no cu e comunidad y instrumentonan necesario pa duna e servicio optimal. Entre nan, e parti di ‘front office’ a muda pa e edifico di Enseñansa pa Empleo, unda cu nan mester a opera den un solo sala, sin computer y otro forma di comunicacion. Un di e desicionan tuma pa agilisa e servicio, tabata di acepta ‘walk ins’ (clientenan sin afspraak), cu porcierto a funciona hopi bon. De hecho, e comentarionan tabata asina bon cu ta evaluando si ta adapta e structura di un forma cu por atende hende sin ‘afspraak’. Segun Ruiz, e motibo pa implementa servicio di afspraak (via internet) tabata pa evita rijnan largo na trabou. Un total di 125 persona por wordo atendi den un dia. Y si tur dicidi di aparece, lo tin rij largo na trabou. Como tal a dicidi pa bay pa e ‘proceso di cita’. Algo cu awor lo por wordo adapta ‘atrobe’.

PROCESA PERMISO

Trabou di DIMAS a continua den e 13 simannan aki, cu a traduci den procesamento di por lo menos 2000 peticion pa prome permiso y of extension. Esakinan awor lo mester wordo procesa. A notifica si na tur hende cu door di e tardansa, esaki por dura entre 3 pa 6 luna pa keda cla. Mientrastanto esnan cu ta atrasa caba, lo wordo trata di procesa den e periodo di 6 pa 8 siman pa un grupo di 6 pa 8 hende a, cu tin esaki exclusivamente como nan responsabilidad. E grupo di persona aki ta parti di e 94 personanan cu ta labora na DIMAS caba.

MANEHO TURISTA

E maneho adapta pa turista, tambe ta vence ora cu cuminsa procesa hende bek na e edificio ‘nobo’. Manera ta conoci, pa evita cu turistanan cu kier extende nan estadia, keda perhudica, e mandatario a implementa un regla di despensacion. Esaki ta ensera cu enves di ta mara na un estadia di 30 dia, (pa ley un turista por keda maximo 30 dia na Aruba), a extende esaki te na 90 dia. E regla aki ta vence 1 di januari 2015. E ta nifica cu e siman aki te cu 31 di december 2014, turistanan cu drenta Aruba, por haci uso di e extension di ‘gracia’ aki pa 90 dia.

PREPARACION PA DIALUNA

Como preparacion pa dialuna awor, a reuni cu e respectivo sindicatonan SEPPA y TOPPA, unda cu SEPPA a keda atendi cune y TOPA ta pendiente ainda. E ministernan respectivo mes lo informa e personal dialuna awor, kico tur a tuma lugar durante e 13 siman, y con nan por ta sigur cu e trabounan haci, ta garantisa e salud y trabou di e trahadonan di DIMAS y DAO.

PROBLEMA EDIFICIO

E problema di edificio a cuminsa for di 'comienso' Algun siman despues cu a drenta den e edificio nobo, a detecta problema cu e.o. holor cu a pone personal bira malo. A opta pa 'evacua' e edificio temporalmente y laga hende drenta bek. Esaki no a resolve e asunto y den un ocasion den apenas 2 dia cu a habri e edificio bek pa servicio, mester a sera esaki di nobo. E ora a opta pa mantene esaki sera pa un periodo mas largo, y haci trabou mas rigoroso di investigacion, prome cu por a pensa di laga trahadonan drenta bek. A haya problema di tuberia, paloma y holornan straño cu no por a identifica na prome instante. Ora cu e edificio habri bek dialuna, ministernan lo duna cuenta di kico exactamente a sosode, kico a wordo haci y mas importante, ki garantia tin cu awor si e trahadonan no ta bira malo mas manera a sosode den varios instante.