Encuesta: Mayoria trahado y negoshi a busca ayudo financiero debi na COVID-19

Encuesta: Mayoria trahado y negoshi a busca ayudo financiero debi na COVID-19

Posted on 05/25/2020 3:50 pm AST | Updated on 05/25/2020 3:52 pm AST

ORANJESTAD – Segun un encuesta di noticiacla.com riba e impacto economico di COVID-19 riba nos isla, mayoria trahado y doño di trahado ta admiti cu pa nan sobrevivi, mester a busca ayudo financiero di gobierno pa por a sobrevivi. Esaki ta cuadra cu e declaracion di gobierno recientemente cu a bisa cu nan a yuda mas di 36 mil persona den sector priva financieramente. Pero tambe interesante tabata cu un grupo grandi di tanto trahado ta bisa cu nan tabatin dificultad pa keda cla pa haya e ayudo financiero aki. Gran parti di esnan cu a participa (176, osea 75,21%) tabata di sector priva, sea trahado of doño di negoshi. Un grupo mas chikito (58 osea 24.79%) tabata sector publico. 

CON EL A AFECTA E TRAHADO 

Mayoria di esnan encuesta, esta 55.32% (130), a confirma cu nan a keda afecta, pero a keda cu nan trabou aunke a bay atras den salario. Un grupo cu a sali ‘positivo’, cu ta 20.85% a bisa cu nan no a keda afecta mes (49). Y 33 persona a bisa cu nan a keda sin trabou (14.04%). 

CON EL A AFECTA NEGOSHI

Pa loke ta esnan cu tin negoshi, 23 (12.37%) a bisa cu COVID-19 no a afecta nan negohi pa nada y esaki a sigui draai bon. Un grupo mas chikito cu ta 14 (7.53%) a bisa cu el a afecta e negoshi un poco y mester a manda hende cas. E mayoria 49(26.34%) a logra keda habri, pero mester a pidi ayudo financiero. Y un grupo di 23 persona (12.37%) a bisa cu nan mester a cera nan negoshi. 

AYUDO FINANCIERO TRAHADO

Pa esnan  cu mester a pidi ayudo financiero, esaki no a bay hopi facil toch. Por lo menos, entre esnan cu a pidi. Pa loke ta e grupo di trahado den sector publico, e mayoria cu tabata 43 (29.45%) no tabata sa con pa haya esaki, sigui pa 37 (25.34%) cu a pidi ayudo y haya esaki y keda cla. Un grupo relativamente grandi entre esnan cu a participa cu ta 33 (22.60%) a bisa cu a solicita ayudo financiero pero no a haye ainda. Y un grupo igual, a bisa cu nan a pidi ayudo, a haye pero cu e no tabata suficiente (33 (22.60%). 

AYUDO FINANCIERO NEGOSHI

Den esnan cu tin negoshi y cu a pidi ayudo, tabatin basta confusion kico mester a pidi. Por lo menos, entre esnan cu a participa. E grupo mas grandi di 45 (34.09%) persona cu tin negoshi ta esun cu a solicita ayudo y a haye y por a sigui draai su negoshi. E grupo cu ta sigui ta di esnan cu no tabata sa bon ki tipo di ayudo mester a busca, y na unda. Esaki tabata 40(30.30%). Un grupo cu tambe ta basta grandi, entre esnan cu a pidi, ta esun cu a pidi, haya, pero no a resulta suficiente toch. Esaki ta 30 persona (22.73%). Y tin un grupo tambe di doño di negoshi cu a pidi ayudo, 17 (12.88%) cu a pidi ayudo y ainda no a haya. 

  • Powered by SETAR