Gobierno ta cancela Toque de Queda diahuebs marduga

ORANJESTAD – Mientras cu gobierno a anuncia dialuna mainta cu ta bolbe cambia e orario di Toque de Queda pa bira awor 12or mei anochi pa 5’or di marduga a anuncia tambe cu diahuebs marduga (aki 3 dia), e Toque de Queda ta keda cancela completo. Diahuebs ultimo caba a cambia e orario y a haci esaki 11’or di anochi pa 5’or di marduga. Pero dialuna (awe) a bolbe cambia esaki cu un ora extra. 

ORDEN DI ABOGADO

Segun minister Andin Bikker, e ta haya cu contrario na pensamento di Orden di Abogado (OdA)cu a cuestiona e legalidad y proporcionalidad di e medida, cu debidamente a proporcionalisa esaki. A haci varios cambio di orario y recientemente a te hasta reduci esaki pa loke ta e areanan vigente. E ta compronde cu no tur ora OdA tin tur informacion pa nan basa nan mes ariba, pero e ta sigura cu gobierno a actua corecto. 

E CAMBIO

Mientrastanto pa loke ta e cambionan, mescos cu tabata e caso siman pasa, ta cu e control y limitacion ta bay ta solamente riba caminda publico. Esaki ta nifica cu si bo ta na bo cas pafo, bo no lo haya multa. Ta solamente si polis hayabo riba caminda publico. E otro excepcion ta pa trafico maritimo. Riba laman grandi, durante toque de queda piscadornan por ta riba laman pero por controla e persona den e botonan aki.