Legalidad y proporcionalidad di toque de queda cuestiona

ORANJESTAD – Orden di abogado, ta cuestiona e legalidad y proporcionalidad di e toque de queda cu gobierno a impone. Asina su presidente, abogado Ronny Wix ta bisa diasabra den un comunicado. E orden ta cuminsa na señala cu e toque de queda a keda prolonga atrobe. E base di e argumento di e orden, ta cu constitucion di Aruba ta garantisa e libertad di movimento y ta ancra den dje. Berdad cu por impone e toque de queda segun un ley, pero asina mes e gobernante ta mara na principio di proporcionalidad y subsidiaridad. Pues ni masque e tin derecho segun ley, mester evalua si e por logra mesun meta sin e regla di toque de queda. Y no ta na discussion si e toque de queda ta viola e libertad di movimento. Y como tal e orden ta preocupa riba e legalidad y proporcionalidad di e regla. 

PRUEBA

Segun e orden, a anuncia e toque de queda sin cu tabatin indicacion concreto cu den oranan di anochi e ciudadano tin mas chens pa keda contagia cu e virus. Ademas, e orden ta haya cu Aruba a drenta den un fase unda cu tur medida ta wordo suavisa. (mester bisa cu a suavisa e orario tambe di e toque de queda: red). Sinembargo e orden a spera cu lo a elimina e toque de queda, pero esaki ‘lamentablemente no a sosode’. ‘Gobierno a indica cu e toque de queda a contribui na un reduccion di crminalidad’. Esaki ta duna di conoce segun e orden, cu gobierno no a impone e medida aki pa combati e virus, sino pa combati crimen. Criminalidad no ta ocasionando calamidad aworaki, den cuadro di e ley di calamidad, pasobra no tin caso di un aumento enorme den criminalidad. Pues, prevencion di criminalidad no ta un base legal pa mantene e toque de queda, por lo menos no awor. E orden ta considera e medida aki esun mas fuerte di gobierno pa coronavirus. Y ta un di e prome medidanan cu mester a cancela. E hecho cu a detene decenas di persona, unda cu a priva nan di nan libertad ‘djis pasobra nan a bandona nan cas’.