Knops: Corsou y St Maarten tambe a haya nan fiansa

DEN HAAG – Den un carta pa Tweede Kamer diabierna, secretario di estado Raymond Knops a informa cu Corsou lo haya un fiansa pa e periodo 15 di mei te 30 di juni 2020 di 204 miyon, sin cu tin cu paga interes. Esaki despues cu diaranson Corsou tambe a acepta e condicionan stipula pa Hulanda. Mescos cu Aruba, e suma di 63 miyon pa e loonsubsidie regeling ta bin disponibel despues cu Cosou entrega un proposicion valido pa e propio contribucion di e trahado dentro di e areglo aki. E resto d di e suma, esta 141 miyon florin Corsou ta haya mesora. 

CONDICION

Condicionan specifico pa Corsou ta valido dirigi riba e sector financiero. Entre nan cu Banco Central mester duna bista riba e situacio financiero riba termino amplio. Corsou mester duna bista riba perdida potencial y duna informacion riba con ta pensa di soluciona e problemanan. Mester nombra un directiva atrobe, cu aprobacion di banco central di Hulanda. E ultimo condicionan aki a keda cuestiona pa tanto Corsou y St Maarten y a bisa di ta acepta e areglo conforme e no viola ley. Hulanda a contesta cu por adapta e ley rapidamente pa asina e areglo no ta den violacion di ley. 

ST MAARTEN

St Maarten tambe a acepta e condicionan diaranson, pa cual den e mesun carta, Knops a bisa cu nan tambe ta haya placa awor. Pa e periodo di 15 di mei pa 30 di juni 2020, nan ta haya un fiansa sin interes di 53 miyon florin. Di e suma ey 24 miyon nan ta haya mesora y e 29 miyon cu falta, ta pendiente cumplimento di St Maarten pa con nan ta bay genera e contribucion di trahado den e parti di loonsubsidieregeling. St Maarten tambe tin mas condicion. Lesa e carta completo AKI.