Minister Wever Croes lo sinta cu sindicatonan comienso di otro siman

ORANJESTAD – Prome minister di Aruba Evelyn Wever Croes a invita sindicatonan SEPPA, SIMAR y SPA pa un reunion e prome mitar di otro siman, pa atende cu nan preocupacion. Di parti di e sindicatonan, a priminti cu e ora no ta bay tin accion, tanten cu ta papiando cu otro. E fecha exacto di e reunion mes no a keda divulga ainda. 

REDUCCION DI SALARIO

Segun Wever, el a disculpa cu mester a yega asina leu di corta den salario di trahadonan publico, pero ta mustra cu esaki so ta suficiente pa e acuerdo cu Hulanda, sin cu tin cu bay impone un tipo di solidariteits belasting. 

WERKSTER

A trata e tema di werksternan tambe di SKOA, cu posiblemente por perde nan trabou debi cu SKOA lo no por paga nan mas. Segun Wever, e mes a tuma riba su dje pa atende cu e asunto aki pasobra si kier sigura cu scolnan ta sigur y limpi, no por habri scol si no tin werkster trahando

MINISTER NO A WORDO ACERCA

Segun Wever, minister di enseñansa a bisa cu e no a wordo acerca pa e veld di maestro. Algo cu e sindicatonan a rechasa y bisa cu no ta hayando oido cerca e mandatario en cuestion. Wever a bisa cu ta importante pa papia cu e minister en cuestion, relaciona cu e asunto di ‘responsabilidad ministerial’ esta cu cada minister ta responsabel pa su cartera. “Nos no por overrule un minister zomaar. Pesey ta hopi importante pa SIMAR y minister tambe ta na mesa. Y mi ta willing pa ta acerca. Ami ta yama e prome reunion” Wever a priminti esnan presente. 

PETICION

A pidi pa no walk out pasobra mester di e hendenan di sector publico. Sin e trahadonan, p.e. pagonan na esnan cu tin cu haya bijstand, no por haya esaki. Y asina tin mas asunto, manera na e oficina di FASE y loonsubsidie regeling. “Mi kier haci e apelacion eynan. Esaki ta e momento pa mustra solidarismo, pa nos mustra cu berdad nos ta hunto” Wever a bisa. A priminti pa sinta comienso di otro siman caba pa sigui papia riba e temanan. Scucha e declaracion di Evelyn Wever Croes AKI.