Sindicatonan a pidi paro na tur decision y cambio unilateral

ORANJESTAD – Sindicatonan a pidi pa pone paro na tur cambio of decisionan unilateral sin participacion di tur stakeholders esencial. Esaki ta un di e puntonan cu sindicatonan diaranson atardi a trece pa gobierno den un carta. Sindicatonan no tin problema cu e sacrificio pa haci entrega di parti di nan entrada, sino e forma con esaki ta sosode. Asina presidente di sindicato SEPPA Magaly Brito a bisa durante entrega di e carta na prome minister Evelyn Wever Croes diaranson atardi. Esaki a sosode despues cu e miembronan di sindicato SIMAR, SEPPA y SPA a marcha di ex DOW pa Bestuurskantoor. Prome cu esey nan a bay Parlamento unda cu ey tambe a entrega un carta pero na presidente di Parlamento Ady Thijsen cu a priminti tambe di atende cu e situacion, y cu otro siman diamars lo tin un reunion cu minister di enseñansa unda cu lo toca e tema aki tambe. Ta despues a marcha bay Bestuurskantoor pa entrega otro carta eynan. A sigura cu nan ta solidario cu tur trahado ‘eyfo’. Pesey a rechasa e declaracionan continuo cu trahadonan di gobierno no ta solidario, creando division cu sector priva. 

NADER ORDER

E hecho cu segun sindicato, gobierno a cambia e decision riba reduccion di salario, di un fecha fijo, pa ‘tot nader order’ (nota di redaccion: ta Hulanda a impone e regla aki), ta contradeci tur documento y informacion di gobierno como dunado di trabou, presenta na mesa. A rechasa tambe a cambio unilateral den enseñansa. Tur cos ta indica segun Brito, cu minister di Enseñansa kier hinca scolnan publico bou di un fundacion lo sigui. 

ACUERDO NULO 

A mustra cu mester respeta negosacionan di trabou di trahadonan publico y esaki mester sosode na mesa y no impone. Como tal cu tur informacion cu tin riba mesa, ta basa riba e berdad y no mitar berdad. Trocemento di informacion ta nifica tambe cu e acuerdo ta nulo. 

REUNION CU GOBIERNO

A pidi tambe un reunion cu gobierno a corto plazo pa sigui atende e carta cu fecha di 20 april 2020 cu e condicionan mara na dje. Despues a sigui pa entrega di e carta.

SOCIAL DISTANCING

Notable tabata e hecho cu no a mira mucho di social distancing durante e entrega di carta na tanto Parlamento como gobierno. Segun Josephine Albertus di SIMAR, tabata intencion pa respeta tur esey, cuminsando cu e marcha unda cu tabatin varios rij di hende (4) pa tene distancia. Pero enberdad ora cu a yega na e dos sitionan menciona, tur cos a bruha y e distanciamento social, no tabatey mas. A nota cu na Bestuurskantoor, tambe prome minister a pidi pa tin social distancing, aunke cu nan mes entre minister y seguridad, tabata para riba otro. Emocion a hunga un rol aki unda cu prensa (inclyendo noticiacla) tambe no a respeta e regla, y ta teme cu esaki lo keda sosode mientras cu cosnan 'normalisa'. 

Scucha e declaracion di Magaly Brito di SEPPA AKI.