SEPPA: No mester a acepta condicion di Hulanda sin mas

ORANJESTAD – E condicion cu Hulanda a pone pa Aruba haya placa, segun sindicato SEPPA, nos (Aruba) mester a wak si nos (Aruba) ta alcans’e. “Si nos no meet e, nos ta bisa Hulanda cu nos no por meet (e). Pero Hulanda lo no laga bo cay, ok, pasobra tin cierto condicion cu bo no a meet”. Esey ta pensamento di Edmundo Marlin di sindicato SEPPA como contesta na noticiacla.com. Segun Marlin, si Aruba a nenga e condicion poni pa haya fiansa, no necesariamente Hulanda lo a laga nos cay. 

MIHO ALGO CU NADA?

E pregunta lansa pa noticiacla na e sindicato, tabata cu si no ta miho acepta (e deal) ya cu sikiera e ora tin placa pa paga trahadonan cu no tin salario mas, envez di tin nada si Aruba no haya e fiansa di Hulanda. Si sindicatonan bringa esaki, por ta cu Aruba no a haya nada, cu ta pio ainda. Marlin no ta di acuerdo y ta insisti cu e forma di proceder di gobierno di Aruba, no ta corecto. 

PONE EXIGENCIA 

Segun e sindicalista, no ta pasobra Hulanda a pone exigencia, gobierno di Aruba tin cu bay na amen di dje. Pa Marlin, Hulanda por pone cuanto cuchiu cu e kier na garganta di gobierno, pero Aruba tin su gobierno pa maneha e pais. “No por ta asina pasobra Hulanda ta pone cierto condicion, gobierno mester bay di acuerdo sin tene cuenta cu e achterban aki”, sugeriendo cu gobierno mester a reuni cu e sindicatonan prome. 

POR BRINGA AINDA?

E pregunta haci tambe pa e portal aki ta cu mirando cu ya caba a cay un decision, cu si tin un vehiculo ainda cu sindicatonan por usa pa logra nan meta. Mientras cu Marlin no a contesta e pregunta, el a bisa cu gobierno a haci un ‘zet’ aworaki usando tempo pa tuma decision. “Locual ta bay bira e arma di sindicato, (ta) pa gobierno mira cu e achterban no ta di acuerdo cu e posicion ey, y pa gobierno cuminsa reconsidera nan posicion pa cualkier otro stap cu nan kier tuma aworaki”. Segun Marlin, ta e achterban ey ta esun cu ta bay tuma decision. “Bo ta un gobierno, si. Bo tin cu maneha un pais, pero bo tin cu tene cuenta cu bo hendenan. 

DECISION UNILATERAL

No ta zomaar pasobra bo ta gobierno, abo ta dicidi unilateralmente dicidi kico bo kier anto tur hende tin cu tume” Marlin a sigui bisa. Segun e sindicalista, e problema ta bin fin di luna ora cu hende cuminsa mira nan payslip e luna aki. Y awor ta tende cu ta algo indefini, enbez di te December 2020.