Segun Knops, ki bal tin autonomia si bo ta depende full di otro

DEN HAAG – “Kico ta autonomia, mi ta puntra mi mes, riba e momento cu bo ta completamente dependiente of a haci bo mes completamente dependiente di Hulanda, den e caso aki, pa ayudo”. Ta declaracion di secretario di estado hulandes Raymond Knops durante e debate den Tweede Kamer diarason mainta riba e ayudo financiero pa nos islanan. 

AYUDO FINANCIERO DI HULANDA 

Aruba den e caso aki ta un di e tres islanan cu a haya ayudo financiero relaciona cu e crisis di coronavirus. A mustra cu si e islanan (incluyendo Aruba) tabatin su situacion financiero na ordo, e lo por tabata miho para aworaki. Pero esey no ta e caso y pesey nan a bati na porta di Hulanda. Segun Knops, esaki ta pasobra finansas publico di e gobierno(nan) no tabata na ordo. A mustra cu Hulanda di otro banda si a logra regla su cosnan bon, ora cu den tempo cu cos tabata bon, a tuma medida pa sigura cu den futuro, lo por a maneha un situacion manera awor. 

SITUACION ISLANAN 

E discussion aki a bin a rais di pregunta di miembronan di Tweede Kamer, riba e forma con e islanan  (incluyendo Aruba) ta maneha su finanzas y si nan ta merece pa haya ayudo financiero di Hulanda (atrobe). Y aki e tema a bolbe bin riba mesa, unda cu Knops mester a hustifica e ayudo, pero mara na condicionan fuerte ( cu lo bira aun mas fuerte, segun e mandatario).  “Politica y goberna segun mi ta, haci escogencia den interes di bo ciudadanonan, y riba termino largo”, Knops a sigui bisa diaranson mainta. “Nos mester constata cu tin mucho hopi politico y gobernante ultimo añanan cu aparentemente tabatin otro agenda, cu no tabata primeramente dirigi na e ciudadanonan” Knops a sigui bisa. Cu tur consecuencia.

SMALL ISLAND STATES

Knops mes momento ta bisa si cu e ta realisa su mes cu no por haci comparacion uno riba un entre Hulanda y e islanan chikito, pa varios motibo, usando e terminologia small island states. Pa varios motibo, tamaño, localidad geografico, industria y constelacion, e ta diferente pa cual no ta bon pa compara e dos paisnanaki cu otro.  Pero segun Knops, esey no ta kita afo cu  e paisnan a anda cu nan asuntonan (financiero) di un forma mucho laat. “A tuma mucho poco accion, y a pospone mucho hopi pa loke ta finanzas publico” Knops a sigui bisa. “Pues e autonomia, bo por bien tin’e a base di statuut, pero si den practica bo ta completamente dependiente di otro, ki balor bo autonomia tin?”. Scucha e declaracion di Knops AKI.