Parlamento a yama minister Lampe pa bin ‘duna cuenta’ otro siman

ORANJESTAD – Parlamento di Aruba a manda yama minister Rudy Lampe (Enseñansa) pa duna cuenta diamars otro siman mainta. Manera ta conoci, enseñansa no ta pasando den su miho momentonan. Varios tema ta den noticia e dianan aki, y noticiacla.com a compronde cu ta fraccion di AVP a pidi e reunion aki. AVP den un aña di tempo a manda no menos cu 4 peticion pa un reunion, tur cu character di urgencia. E ultimo tabata na februari ultimo. E intencion ta pa Lampe duna cuenta di kico ta pasando den enseñansa. Temanan manera Colegio, intencion di habri scol cu orario mas cortico, reapertura di scol y mas, lo ta sigur topiconan cu e mandatario lo mester atende. Diamars atardi riba su pagina di facebook, Lampe a tene un presentacion cu e meta segun e mandatario, pa desmenti varios ‘fake news’ cu ta circula. Entre nan, asunto di werkster di SKOA cu e lo no kier paga mas, kita un klas di dornasol, perhudica Colegio Arubano San Nicolas etc. E reunion di diamars ta programa pa cuminsa pa 9'or di mainta y lo ta uno publico.