Tres sindicato ta marcha bay Bestuurskantoor diaranson atardi

ORANJESTAD – E motibo cu varios sindicato (SIMAR, SEPPA y SPA) a opta pa bay den un marcha di protesta diaranson awor, segun presidente di sindicato SIMAR Josephine Albertus, ta pasobra a mira cu e forma tradicional no ta funciona. “No. E biaha aki nos ta bay marcha hunto” Albertus a bisa. E sindicatonan diaranson lo marcha pa bestuurskantoor y entrega un carta na gobierno pa mustra e disgusto cu tin den e veld di enseñansa, di un otro manera.

COMIENSO

Segun Albertus, e problemanan ta hopi, y sindicatonan ta cansa di e trato cu nan ta hayando. Ta referi na e hecho di gobierno di unilateralmente firma un acuerdo cu Hulanda sin inspraak di e sindicatonan. Segun Albertus, ora cu Hulanda a duna Aruba e condicion pa e fiansa nobo, a duna Aruba tempo te dia 20 di mei (for di 13 di mei) y gobierno a core firma, siendo cu nan por a sinta cu sindicatonan y delibera. A sigura cu no ta cu nan no kier entrega parti di nan salario, pero e mester ta algo husto. 

TOT NADER ORDE

Un di e problemanan cu tin, ta cu mientras a bisa cu e ahuste di salario debi na e coronavirus lo ta te December  2020, awor Hulanda a impone cu esaki lo bira ‘tot nader order’, pues Dios sa te ki dia e medida aki ta keda na vigor. “Si nos laga nan sigui riba e manera cu nan bayendo aworaki, unilateral, dicidi y deshaci, despues di esaki, nada no ta keda mas. Y esey no ta husto” Albertus a bisa. Pesey a bisa cu awor tin cu bisa cu ta basta, y cu hunto no ta solamente SIMAR, SEPPA, SPA sino tur hende (pueblo) ta haya cu ta di mas.