Segun gobierno, accion di sindicatonan ta perhudica empleado publico

ORANJESTAD - Segun gobierno, accion di sindicatonan ta perhudica empleado publico. Asina gobierno su oficina di prensa a informa diamars atardi pa medio di un comunicado. Segun e comunicado, sindicatonan a tuma varios accion caba cu a perhudica e empleado publico. Entre otro cu nan accion di bay entrega keho na VNO, a conduci cu aparte di entrega salario, awor Hulanda ta exigi pa para indexering tambe. 

Sindicatonan SEPPA y SIMAR a anuncia un otro accion diaranson awor, dirigi segun nan riba e hecho cu Gobierno no a consulta cu nan prome cu a acepta e condicion adicional di Hulanda pa baha gasto di AZV. 

Segun e comunicado, ta importante pa señala cu Gobierno di Aruba y Parlamento di Aruba ta trahando pa un tempo caba riba rebaho di gasto di AZV. Pues e condicion adicional di Hulanda tocante AZV, no ta nobo. E ta dificil si, especialmente den tempo di crisis. Pero segun gobierno, ta importante pa sindicato realisa cu si nos no a acepta e condicion, no lo tin placa pa paga salario di ambtenaar otro siman ni otro luna. Tampoco lo tabata tin placa pa hinca den e fondo di AZV ni SVB. 

Gobierno a acepta e condicion mesora pa garantisa salario di empleado publico, y pa garantisa contribucion na e fondo di AZV. 5 miyon florin, apesar cu e ta hopi duro pa entrega awor, bou e circumstancianan aki, ta lo minimo. Esnan cu ta realisa cu nos ta den crisis si ta realisa esey. 

E accionnan di sindicatonan SIMAR y SEPPA ta mustra mas bien cu nan no ta realisa e embargadura di e situacion cu nos ta aden, y ta mustra egoismo. Gobierno a haci un apelacion riba e sindicatonan aki pa mustra solidarismo, no egoismo.