SKOA: Tratando pa evita cu 90 werkster ta keda sin trabou

ORANJESTAD – Trabou di por lo menos 90 werkster cu ta traha pa scolnan di Stichting Katholiek Onderwijs Aruba (SKOA) lo ta na peliger si gobierno no ahusta e subsidio pa e werksters. Asina Anuesca Baly, e director di SKOA ta bisa noticiacla.com. Segun Baly, SKOA tin 90 werkster cu tin cu mantene 600 lokaal reparti den 46 scol. Na aña 2015 e Minister di Enseñanza den un decreto MInisterial a dicidi di subsidia e werksters cu ta traha pa SKOA pa di e forma ey garantisa limpiesa di skolnan. Minister di Enseñanza actual no ta di acuerdo cu e decision aki y na december 2019 a dicidi di hasi cambio den e forma di subsidio pa e werksters y ademas a reduci e subsidio aki substancialmente. E consecuencia di esaki ta cu SKOA no ta dispone di fondonan pa sigui paga e salarionan tampoco e primanan di impuesto y otro debernan fiscal. Segun e director, e debe cu SKOA tin aworaki a subi di tal forma cu dentro di poco no por sigui paga e werksternan aki mas. Net awor den e temporada di crisis cu limpiesa ta ainda mas crucial pa  edificionan escolar. 

E SITUACION

Despues di 2015 e werksternan tabata wordo paga via subsidio directo di gobierno. E salarionan tabata forma parti di esaki y tur aña/luna tabata manda e lista pa Directie Onderwijs y nan ta manda esaki financien despues di controle, cu tabata percura pa e pago tuma lugar. Despues di december 2019 esaki a cambia awor, unda cu e werksternan diripiente ta cay bou di e post di exploitacion, cu ta nifica cu e pago cu ta wordo subsidia ta menos y y no lo cubri salario di tur e 90 werksters. Entre otro SKOA no ta ricibi e fondonan pa ‘draag af’ primanan fiscal. SKOA no ta un organisacion commercial y no ta genera fondo, y como tal ta bira dificil pa paga e primanan. Y for di e januari 2020 e debe cu SKOA tin cu impuesto pa e primanan, a aumenta di tal forma cu pronto mester tuma un decision y esey ta bay nifica corta e cantidad di werkster, of kita tur mes. Simplemente pasobra no por paga nan mas. 

CASO SUMARIO

SKOA a inicia un caso sumario contra minister di enseñansa pa asina pidi pa mientras cu ta bringando esaki den corte di LAR, percura pa medio di un decision provisional (voorlopige voorziening), pa continua  e pagonan  te ora cu ricibi un decision den e caso di obhecion (bezwaar). Pero huez luna pasa a dicta na fabor di gobierno, indicando cu no tin urgencia pa bay di acuerdo cu e peticion di SKOA ainda ya cu for di januari  gobierno ta cumpliendo cu e pagonan, apesar cu e pago aki no ta completo, te ora cu e investigacion cu gobierno a inicia riba e asunto, termina. Esaki a cambia recien ora cu Minister di Enseñanza a tuma decision pa stop e pago cu ya caba ta reduci, apesar cu su investigacion no a termina pa motibo di corona virus. Esaki ta trece cu ne cu e momento cu no por paga e werksters mes ta hopi cerca  cu tur e consecuencianan cu esaki ta trece cu ne. SKOA ta hasi un apelacion riba Minister di Enseñanza pa en todo caso continua cu e pagonan manera cu ela bisa den corte te ora cu bin un decision riba e obhecion cu SKOA a entrega. No tin fecha pa e caso wordo trata ainda, pa motibo cu tur caso a wordo posponi door di medidanan di prevencion encuanto Corona virus.