Encuesta ta mustra cu tin hopi duda ainda pa hiba mucha scol

ORANJESTAD – Un dia despues cu scolnan por a habri bek (18 di mei 2020), esaki toch no a sosode grandemente, den sentido cu mayoria scol na Aruba a keda cera. Mientras cu hopi (si no ta mayoria) a bisa cu e motibo ta cu nan no ta cla pa habri, debi na preparacion, si e scolnan lo a habri toch, e resultado lo por tabata scolnan bashi toch.Y e resultado di un encuesta di noticiacla.com por tin e splicacion. E pregunta tabata pa sa kico abo como lector di noticiacla cu tin yiu(nan) cu ta bay scol, ta pensa cu scolnan a habri bek y si nan lo hiba nan yiu(nan) scol. Y e resultado ta mustra cu tin hopi pregunta y duda ainda. Di e 1030 personanan cu a participa den e encuesta, 171 (16.6%) tabata completamente di acuerdo cu scol ta habri, y sin ningun reserva pa hiba nan yiu(nan) scol. Di otro banda, tabatin 325 (31.55%) cu a bisa cu nan no ta di acuerdo cu scol ta habri awor y sigur ta tene nan yiu(nan) na cas. Pero mas interesante tabata esnan cu tin duda. E grupo ey tabata mas grandi. Mientrastanto dialuna anochi, pediatra Wicha Ponson a bin den e briefing di gobierno pa atende cu e miedonan cu tin ainda pa manda mucha scol. 

DUDA 

A haci varios pregunta specifico riba esnan cu tabatin duda y no tabata cla ainda pa hiba mucha scol. E grupo aki (un total di 502 cu ta 48.75%) sea no tabata sigur di e decision pa falta di informacion, of tabatin miedo pa contagion, y asina tabatin mas. Entre e grupo aki esun mas grandi ta uno cu ta ok pa bay scol, contal cu seguridad y higiena pa mucha y docente por wordo garantisaE grupo aki tabata 338 (32.82%). Aunke e grupo mas chikito di esun di 502, esta 70 cu a participa (6.80%), tin miedo pa nan yiunan keda contagia, aunke cu autoridad di salud a bisa cu muchanan ta e grupo cu menos risico pa contagio. Un grupo un poco mas grandi cu ta 94 (9.13%) kier pero ta bisa cu tin falta di informacion pa e por dicidi. Pues por deduci cu si duna mas informacion y kita tur duda, mayoria di esnan encuesta, lo ta dispuesto pa hiba nan yiunan scol. Wak e resultado AKI.