Aruba a firma acuerdo cu Hulanda pa ricibi otro fiansa

ORANJESTAD – Manera cu noticiacla.com a raporta dialuna mainta, (cu den curso di dia Aruba lo firma e acuerdo pa haya placa) den oranan di atardi, gobierno di Aruba (lesa: minister Xiomara Maduro ) a firma e acuerdo di prestamo (leenovereenkomst) pa e di 2 tranche di sosten di likidez pa un suma di 63,9 miyon florin. Corsou y St Maarten di otro banda, ainda no a dicidi y tin te mayan pa haci esaki. Manera e portal aki a raporta, Aruba (unabez a tende di e condicion) a dicidi mesora (diabierna caba) cu nan ta bay di acuerdo. Asina cu nan a manda bisa Hulanda, e acuerdo a bira uno official. 

DESTINACION DI FONDO

E fondonan aki cu Aruba a haya aproba, ta destina pa por cubri gastonan di gobernacion di nos pais y pa por brinda e yudansa necesario. Awor cu Aruba a bay di acuerdo cu e condicionan,  Conseho di Minister di Reino a bay di acuerdo pa asina Aruba por haya e yudansa di sosten di likidez cu ta conta pa e periodo di 15 di mei te cu 30 di juni 2020. E sosten di likidez ta wordo duna den forma di un 'zachte lening' na 0% di interes y mester wordo paga aki 2 aña. Esaki ta e di tres fianza cu Gobierno ta ricibi di Reino Hulandes pa asina por surpasa e crisis di COVID-19.