Exigencia pa baha gastonan di AZV ta contradictorio

ORANJESTAD – E condicion cu Hulanda a pone pa Aruba pa reduci gasto di AZV cu 5 miyon pa luna, ta un ‘tiki hopi’ contradictorio. Asina minister di salud Dangui Oduber a bisa dialuna anochi durante e briefing pa coronavirus. Ta su prome reaccion desde cu Hulanda a impone e condicionan siman pasa diabierna. Mes momento e mandatario a bisa tambe cu no tin mucho opcion pa reduci e gastonan manera pidi pa Hulanda. 

CONTRADICION

Segun Oduber, di un banda Hulanda ta exigi pa reduci 5 miyon di gasto di AZV conforme e colegio di supervision financiero CAft, mientras di otro banda, RIVM ta pidi pa amplia e cuido medico pa por yuda combati COVID-19. Entre otro pa percura pa tin suficiente material pa combati e virus. Pues esaki ta pone cu e peticion ta contradictorio segun Oduber. 

GASTONAN EXTRA DI AZV 

E gastonan di AZV segun Oduber a aumenta cu 38 miyon florin, despues cu a entrega un presupuesto 2020 cu un contribucion di gobierno na AZV tabata 0. E gastonan extra mester a bin pa asina gobierno por a cubri gastonan di e testnan cu tin cu haci pa e COVID-19, y tambe pa manda pashentnan cu mester di cuido den exterior, awor pa lugarnan manera Miami y Hulanda. Ambos destinacion ta mucho mas caro cu Colombia, cu tabata e lugar di manda pashent den exterior. E mandatario, riba pregunta di e portal aki, sinembargo no por a cuantifica cuanto di e suma menciona (38 miyon florin) ta bay pa compra di test y cuanto ta bay na manda pashent pa exterior. 

OPCION

Riba e opcionan, Oduber a contesta noticicla.com cu esaki ta pa e.o. negosha cu RIVM riba e gastonan cu tin pa cu e necesidad pa mantene Aruba na ordo pa loke ta e capacidad y preparacion riba nivel medico. Hopi otro opcion no tin segun e mandatario. E cambionan mester ta cla pa presenta na Hulanda prome cu 1 di juni proximo. 

MAN MARA

Oduber a confirma cu lamentablemente e mannan di gobierno ta mara ya cu si gobierno di Aruba no cumpli, Aruba lo no haya e placa cu Hulanda a pone disponibel. Y mirando cu Aruba mester di e placa, no ta keda nada otro cu cumpli cu e exigencia fuerte aki, y tin cu wak con ta bay logra esaki.