SMOA ta desmenti tur alegacion di docentenan di Colegio Arubano

ORANJESTAD – Directiva di Stichting Middelbaar School Aruba (SMOA) kier pa den futuro, e asosacion di docente  di Colegio Arubano (ALV) reuni cu directiva di e scol, envez di manda informacion pa otronan. Den un carta di contesta (cu noticiacla.com a pone su man ariba) e presidente di Robert Croes ta contesta e carta di ALV. Croes (SMOA) ta lamenta e hecho cu ALV a scohe e caminda cu nan a scohe, unda cu nan a comparti ‘yen di informacion incorecto’. Y Croes ta sigui pa mentiona varios ‘supuesto inquietudnan’ di e docentenan. 

PUNTONAN

Entre e puntonan Croes, ta desmenti cu nan no ta disponibel pa papia, y ta alega te hasta cu ta e docentenan algun biaha a cancela nan cita cu e directiva. Si no tabatin hopi atencion pa ALV, ta pasobra ora cu nan (e directiva) drenta, nan a haya nan mes confronta cu yen di problema, di cual un scol sin rector tabata uno. Tambe e acusacion cu e scol ta busca un rector cu no tin conocemento di enseñansa, no ta corecto segun SMOA. Indicacion di mal maneho di fondo tambe ta wordo cuestiona y a sigura cu ta usa accountant independiente cu ta haci tur control. Kier sinta riba stul di maneho di Colegio y maneha estilo micro, tampoco ta cuadra segun SMOA. Y finalmente, (tin mas punto) e punto cu ta purba maneha Colegio manera un negoshi envez di un scol, ta wordo cuestiona. Segun SMOA, ALV ta lubida pa mira cu Colegio pa hopi aña ta sufriendo perdida. Gobierno lo a reduci e subsidio, cu tambe ta afecta e situacion financierto di e scol. Y como tal ta purbando pa drecha e situacion financiero di e scol y esey ta un di e metanan di e directiva di SMOA, segun e carta di contesta. Finalmente, e directiva ta spera cu den futuro, tur problema wordo atende prome cu e directiva di scol mes, via e rector, cu na su debido tempo lo transferi e asunto pa e directiva di SMOA si ta necesario, envez di bay comunica cu partinan ‘externo’ riba e tereno aki.