Gobierno lo a ‘overrule’ decision di su propio minister

ORANJESTAD – Gobierno di Aruba lo a ‘overrule’ un decision di su propio minister den fin di siman. Ta trata di e minister di enseñansa Rudy Lampe, cu lo no a haya aprobacion riba e tema di cambio pa loke ta maneho di aña escolar nobo. Mas concreto, e conseho riba con ta regla e cantidad di dianan di scol pa varios tipo di scol.Tabata  direccion di enseñansa cu a presenta e conseho na e minister, cual e minster a aproba, pero cu despues segun un publicacion di e matutino diario riba nan facebook page, gobierno di Aruba a confirma cu esaki a keda desaproba. E bay bin di e noticia aki a causa basta consternacion den fin di siman den comunidad, primordialmente mayor y docentenan. No ta prome biaha cu e minister aki ta wordo 'contradeci' pa e gobierno, ya cu den pasado recien, minister president mes mester a 'cai' aden riba varios tema y 'trek' esaki 'recht'. Siman pasa ta e minister president mes (envez di Lampe) tabata esun cu a anuncia reapertura di scol, mientras cu esaki tabata trabou di Lampe. Lampe a haci e anuncio di cierre y tur e otro fechanan di pospone reapertura. 

E CASO

Tabata diadomingo anochi cu un aviso di e matutino Diario a keda publica riba Facebook, cu tabata ilustra e cambionan cu direccion di enseñansa a propone na minister, y cu lo a keda aproba pa e minister. Entre nan, cu entrante aña escolar nobo 20/21, kleuterschool lo ta habri 3 dia pa siman y 2 dia na cas, basisschool 2 dia pa siman so, y 3 dia na cas, Ciclo Basico 2 dia pa siman na scol, y e resto na distancia, Ciclo avansa 1 dia pa siman scol, y e otro dianan riba distancia, EPB y SPO 2 dia pa siman scol y otronan riba distancia, EPI, Universidad y IPA 100% na distancia. Esaki tabata e conseho di 7 pagina cu e departamento a manda pa e mandatario dia 4 di mei 2020. E mandatario a contesta e departamento riba e mesun fecha, esta 4 di mei, cu esaki ta aproba. Tur esaki por wordo lesa riba e pagina di facebook di e minister. 

DESMENTI

Ora cu Diario a publica e grafico aki, (e carta di Directie Onderwijs) tabata circula riba ‘caya’ caba) basa riba e dato di e direccion di onderwijs, esaki a crea consternacion den comunidad. Pero algun rato despues, Diario a publica un ’aclariacion’, bisando cu e loke cu nan a publica, tabata un ‘conseho’ di directie onderwijs y cu ‘Gobierno di Aruba a confirma na Diario un rato pasa pasa cu e conseho aki a wordo ‘desaproba’ door di comision di crisis’. Mientras cu ta menciona e comision di crisis, esaki ta parti di gobierno tambe ya cu prome minister ta presidi e comision. Como tal, gobierno a ‘overrule’ e decision cu e minister a tuma. Mester bisa cu awe mainta, ainda e carta di aprobacion di e minister en cuestion, ta riba pagina di e mandatario y no a wordo ‘coregi’, manera cu gobierno ta bisa. 

CRITICA

Riba Facebook y whatsapp, comentarionan y critica a cuminsa zona e fin di siman riba e tema aki. Entre otro, ‘unda ta laga mi yiunan pa resto di e dianan’, ‘esaki ta irresponsabel’ etc etc. For di por lo menos dos mayor, e portal aki a compronde cu si esaki bira realidad, nan ta bandona Aruba y bay Hulanda unda cu por lo menos eynan si nan por garantisa un enseñansa drechi pa nan yiunan. E pensamento di cu sin cu tin tur e asina yama ‘randvoorwaarden’, no por djis hisa benta y elimina varios dia di scol pa varios nivel, y laga mayornan sinta cu un problema aun mas grandi. Varios mayor a cuminsa bisa cu nan ta preocupa, kico nan tin cu haci cu nan yiunan pa e dianan cu ‘no tin les na scol’, y cu nan no ta docente pa por siña e mucha. Otronan ta bisa cu si e intencion ta pa sigui cu les via computer, no tin garantia cu esaki lo funciona ya cu internet no ta bon, y of no tin suficiente forza y computer pa garantisa un bon proceso di les. 

MINPRES RIBA 60% CU NO A HAYA LES

Loke ta resalta ta cu siman pasa ainda prome minister Evelyn Wever Croes mes a bisa cu como hustificacion pa habri scol bek, cu esaki ta gran parti pasobra 60% di e alumnonan na Aruba no a haya les durante e 2 lunanan cu a cera scol, y cu simplemente no ta responsabel pa sigui den e situacion aki. Pues, cu esaki den mente, no ta responsabel e ora pa cuminsa un aña escolar nobo cu menos les, sino cu a ‘remedia’ e situacion di e  60% di alumnonan cu no a logra haci les. 

DIRECCION DI ENSEÑANSA

E portal aki a tuma contacto cu e directora di Direccion di Enseñansa dialuna mainta, pero ainda no tabatin exito. Asina cu esaki logra, lo por actualisa e raportahe aki.