Mayoria chikito di esnan encuesta no kier Aruba habri frontera ainda

ORANJESTAD – E mayoria chikito di un grupo di 4 mil (4.000) usuario di noticiacla.com encuesta e siman cu a pasa, ta contra e decision di gobierno pa habri frontera entre 15 di juni pa 1 di juli. E motibonan principal duna, ta e.o. Aruba su mercado principal di turista (Merca) no tin e situacion den control, y cu nos por haya nos mes cu un di dos ola fuerte. E cantidad cu ta pro, ta bisa si cu mester tin cierto condicion na lugar prome cu habri. E medida mas menciona, ta esun di bisti mondkapje y material higienico disponibel. 

E RESULTADO

E encuesta tabata riba e pagina di Facebook di noticiacla, y e formato aki ta duna solamente pa dos respuesta. E encuesta su pregunta tabata uno basta ‘simple’:’Gobierno di Aruba kier tentativamente habri frontera entre 15 di juni y 1 juli 2020. Abo ta haya cu esaki ta corecto?. Un total di 4 mil persona a participa na e encuesta aki durante 7 dia. Di e 4 mil, 2 mil 200 persona a bisa NO (55%), mientras cu 1 mil 800 persona a bisa SI (45%). Pues mientras cu un mayoria chikito a bisa ‘NO’, e isla ta practicamente dividi riba e tema. E encuesta no ta representativo pa Aruba, aunke entre e usuarionan di noticiacla.com, e ta un indicacion di kico ta biba entre nan. Den e proximo encuesta cu ta andando, e formato ta un poco mas amplio, no ta via e facebook di e portal y ta duna mas posibilidad di contesta. E tema e biaha aki ta si mayornan y docentenan ta di acuerdo cu ta habri scol bek awe. Pa fin di dia, e resultado lo ta conoci. Pa esnan cu kier participa ainda, por click AKI. E resultado ta anonimo.