E siman aki Aruba ta haya 63.9 miyon florin for di Hulanda

DEN HAAG – Gobierno di Aruba ta ricibi e suma di 63.9 miyon florin e siman aki for di Hulanda. Vocero di secretario di estado hulandes Raymond Knops a confirma esaki dialuna mainta pa noticiacla.com. “E ta na caminda”Emile Vaessen a bisa. Hulanda ta manda e placa, pasobra Aruba a dicidi di acepta e condicionnan (dificil) cu Hulanda a pone pa por duna Aruba e suma. “Asina cu tin acuerdo, e oferta ta bira valido” Vaessen a sigui bisa. 

NO APROBA AINDA

Berdad ta cu diabierna Hulanda no a dicidi nada ainda, manera cu e portal aki a haya confirma pa Vaessen, pasobra e tres ministernan plenipotenciario di e respectivo islanan a dicidi di warda un rato pa nan reuni cu nan respectivo gobierno. Y a palabra e ora cu pa diaranson awor (otro mayan) Hulanda lo tende di e islanan. Aruba, mientrastanto a dicidi casi mesora diabierna den dia, cu aunke dificil, nan ta bay di acuerdo cu e condicionan aki. Esey a bin despues. Algo cu minister di finanza di Aruba Xiomara Maduro tambe a bisa e portal aki durante curso di dia diabierna. Corsou y St Maarten sinembargo ainda no a dicidi y ta den un situacion mas dificil, pasobra eynan e condicionan ta mas fuerte ainda. Corsou ta resistiendo y St Maarten tambe. Nan tempo ta caba diaranson awor. Pa loke ta Aruba, ainda falta pa ricibi 49.4 miyon florin, pero esaki ta bin ora cu CAft informa Hulanda cu Aruba a cumpli enberdad cu e condicionan stipula.