SIMAR: Gobierno a engaña pueblo riba fiansa di Hulanda

ORANJESTAD – Sindicato di maestro SIMAR ta culpa gobierno di a engaña e pueblo cu e asunto di fiansa di Hulanda. Asina un carta di dos pagina cu e sindicato a manda diasabra pa prome minister Evelyn Wever Croes. Segun e presidente Josephine Albertus a bisa noticiacla.com diasabra, nan tin nan fuentenan cu a informa nan di e caso aki. Diabierna e portal aki tambe a raporta e ‘discrepancia’ aki, esta cu Hulanda lo no a aproba e fiansa, mientras cu Aruba ta bisa cu si. Gobierno di Aruba a sigura e portal aki mientrastanto cu e ‘e deal ta cla’ y cu ‘Aruba a bay di acuerdo cu e condicionan caba’. 

SIMAR

E carta di Simar pues ta cuestiona e forma con gobierno diabierna a informa comunidad, y cu ‘no tin uniformidad den e informacion. Simar ta mustra cu nan a tuma nota di e conferencia di gobierno di Aruba cu ta papia di e ‘prestamo suave’ di Hulanda cu lo a keda aproba. “Remarcable ta cu contrario na boso informacion, secretario di estado Raymond Knops ta bisa algo otro, cu ta bisa cu representantenan di Aruba (y e otro dos islanan Corsou y St Maarten) a pidi pa reuni cu nan respectivo gobierno. Y cu segun Knops, tin un oferta pa e pakete di medida y cu diaranson awor 20 di mei, lo sigui delibera esey. Tin condicionan mara na e decision, y cu como tal ainda no tin un aprobacion. 

GAÑA

For di esaki segun SIMAR, ta resulta cu no tin ‘uniformidad’ den informacion. “E ta crea e impression cu e imformacion no ta basa riba hechos real y cu por bisa a lo minimo cu ta papia aki di engaño di e pueblo” e carta ta sigui bisa. “.Den un estado democratico, e pueblo tin derecho riba frankesa y mester por confia riba informacion cu ta corecto y no informacion cu no ta berdad.  Aki ta unda cu e sindicato ta bisa cu gobierno mester actua segun principio democratico y actua corecto cu respet y honor pa e pueblo di Aruba. Como tal e sindicato kier claridad di e gobierno pa trece claridad. 

E SITUACION

Manera cu e portal aki tambe a raporta diabierna, Hulanda a desmenti cu tabatin un acuerdo, y cu ta te diaranson otro siman lo sigui trata esaki. Gobierno di su banda a reacciona mesora contra e portal aki, indicando cu e informacion no ta corecto. Esaki den sentido cu tecnicamente tin un acuerdo ya cu Aruba a dicidi caba di bay di acuerdo cu e condicion. Y cu esey ta nifica de facto cu Hulanda lo aproba e fiansa, ya cu Aruba pues, a bay di acuerdo. Como tal gobierno no ta compronde e ponencia di e portal aki. Esaki sinembargo, ta e interpretacion di e gobierno cu ta cay riba un parti tecnico, mientras cu formalmente Hulanda no a anuncia cu e fiansa ta aproba. Lesa e carta di SIMAR AKI. 

  AKI