RMR: Aruba mester baha gasto di AZV cu 5 miyon mensual

ORANJESTAD – Gobierno di Aruba mester baha gasto mensual di e seguro general medico AZV cu 5 miyon, y tin cu informa RMR con e tin pensa di haci esaki prome cu 1 di juni proximo. Esaki ta un di e condicionan cu Hulanda (RMR) a pone specificamente pa Aruba cu e tin cu cumpli cu ne pa e haya mas placa fia. Asina un carta di 6 pagina di secretario di estado hulandes Raymond Knops (cu noticiacla.com a pone su man ariba), ta bisa.   

MEDIDANAN GENERAL

Na inicio di e carta caba mientrastanto, como medida ‘en general’ Knops kier pa reduci salario di tanto politico, ambtenaar y directornan di companianan estatal di gobierno. Diabierna parlamento di Aruba a aproba e ley caba cu ta reduci nan salario cu 25%. Ministernan no mester di un ley pa reduci di nan pero a sigura cu esaki lo tuma lugar. 

JULI

Comienso di juli, RMR lo reuni riba e tema di ayudo di likides pa un termino largo. “Esaki lo no bin via gobierno, sino un entitidad cu Hulanda por conta cu resultado” e carta ta bisa. Cua entidad esaki ta, no ta conoci. Tur palabracion cu keda haci e momento ey, lo wordo discuti cu tur e islanan, unda cu CAft lo haya un tarea importante. Den e mesun RMR di 3 di juli proximo, lo dicidi di e paisnan a cumpli cu e condicionan cu Hulanda a pone. “E combersacion di e futuro (cercano) no ta opcional” e mandatario ta sigura den e carta. “Mas sosten ta depende di e palabracion y e resultado”. Knops ta sigura cu tur esaki a keda subraya cu tur e islanan y minister president hulandes Rutte. 

ARUBA TA BAY DI ACUERDO

Mesora despues di e reunion di diabierna, Gobierno di Aruba (lesa:minister Xiomara Maduro) a sigura e portal aki cu Aruba a bay di acuerdo cu tur e condicionan aki. Segun Knops, diaranson otro siman partidonan ta bin hunto pa laga sa (incluyendo Aruba) si nan ta bay di acuerdo cu e condicionan. E ora Aruba formalmente lo mester informa Hulanda, aunke informal esaki lo a sosode caba. Hulanda mientrastanto, no ta considera e condicionan ‘asina severo’, manera islanan manera Corsou a laga sa cu nan ta. 

FIANSA

Pa loke ta e suma di fiansa pa Aruba, Knops ta bisa cu e isla ta haya 113.3 miyon florin dividi den 63.9 miyon cu e ta haya mesora. E diferencia di 49.4 miyon destina pa e asina yama loonsubsidie e ta haya unabez cu e duna contenido na e parti di contribucion di trahadonan. RMR lo keda informa pa CAft asina cu Aruba cumpli cu e parti aki. 

AZV

Ya riba pagina 2, secretario di estado hulandes Raymond Knops ta bisa cu (manera e portal a cuminsa raporta na inicio di e articulo aki) Aruba, prome cu 1 juni proximo esta aki dos siman) mester baha 5 miyon na gasto di AZV, y raporta esaki na e colegio di supervision financiero CAft. 

CONDICIONAN GENERAL

Pa loke ta e condicionan general valido pa tur e islanan, esaki ta encera entre otro cu mester implementa e medidanan necesario entrante 1 di juli proximo.